SEP 05 – KITUNGAN A SANABYU!

“Bindo asui ayam lingan sanabyu Kitungan j’eng-ben a jaitan duaih suman a d’ong ablamaite. Gamangtung-len Jisun asuyeman debente” (Romi 16:20).

Kitungle Sanabyu Kitungan-na. Bo bigda saring, sonuman sanabyun abaldungte. Anten asan kuddub ayam Kitungan do sonuman sanu-ling dakutenji, itedele-janang dainan anlen-na. bayale Kitungan a sanabyu sonuman a d’ong jingbabe gablute. Anin gamle, “…Hen aman do insalon amang lingan bar birinda-nam do insalon a birinda lingan arasanggeman amdungtai; Anin b’ob-nam abparate do aman anin a danungkurdijengan abparate” (Aparamangtan 3:15). Kan aberna Anin oblingle Eden kuttan-lingan-na.

Kitungan abojoraile kalobori arakadang-lingan. Anin sonuman a b’ab abaldungle do sonuman abara abs’iedle, amihaman batte. Kan asan Kitungan a On anindaman ordarban yirai. Do kun batte sonuman banantongan batte takarle, Kristun amihaman batte.

Nepoliyon adainan atikki ateng desanji, as’i-lingan adakule adaneben itsumle. Agante asanu-maranji ampara arberleji, ordaran amap absuile gametenji. Kun amapling, ateng desanji j’e-e inkun batte gnaron dele, kun ate britishmaranji as’i-ling dakule. Do nepoliyon kun uailoge gamle banraban batte, bogad j’e-e-inku adakulenden, kuddub ordaran as’i-lingan pedeben danete.

Kun ambrij, sonuman janang kuddub ordaran as’i-lingan adaneben itsumte bindo kun ate rapti adea. Kuddub pwrardanji Jisu Kristun amiham batte anablu adelen asan, Golgota-lingan alala batte. Bindo Kitungle,  karahid danemaran saring daina hangle, arakadang-lingan akarahidan batte. Kun asan anlen gamben dete, Kitungan a d’ong abgugule gamba: “…ayengan a Kitungan Jisu Kristu Gamangtung-len batte dainan tiytiylangten, Anin a d’ong sanensenan de-ete.” (1 Korintia 15:57).

Agante Asangemmaralen, sonuman duaihbaran alumben yirtai mang-ling-len, adnang Kitunglen atapdong ababan labmaile abs’i-ete. Nami adena-linganji, Pol gadlamlangten: “Kitungan asanabyu batte sonuman a d’ong jingbalen gablute.”

Bo ordardage amandran enegoi gamete: “Sannasijanji do surda maranji agagananji ansadageted, yangam aninji gagatenji. Aninji asinji batte gaganan gateji. Aranaptinji gagananted batte, bindo iten aninji agaga-agatenji batte.” Kun ambrij, amben Kitungan ampara adakulenanden, agate asin batte Anin sanabyun tiybenten. Mandran Kitungan adamba yirbendete anablu ayangben asan. Uante radu dernamaranji dakuji, amandrengnaji man’oihan Kitungan asanabyu-ling dakute. Tanahimdam Kitungan a onagji, amben Kitungan asanabyun batte barij dakupo?

Okiy Kinolbe absele: “Iten asan gamlenden Kitungan duihduai a Kitung ted, bindo sanabyu Kitungan maih daku” (1 Korintia 14:33).