ORDAR LINGAN SANABYUN!

“Kuddub saring Lanangka Kitungan a d’ong ganugu panemengan, do ordar desa lingan Kitungan a d’ong abm’oihten a mandranji amang lingan sanabyun de-ete” (Luk 2:14).

Ordar lingan sanabyun debendete a berna mandranji sattangted bindo Kitungan a pissirdianji ja anogalan. Jisu Kristun a karukudan ayamling, Pissirdianji ganijtan dele ruanglingan gupamaranji amangba, do gamleji bangsa anoblingberan mangbabe ‘Ordar lingan sanabyun de-ete’.

Nami ‘Ordar lingan a Sanabyun’ abmele a galamba. Bibolan gamte, “Odlan on murkundardan ampara basute, do garhrdingkidan onmedan ampara dimadte; ontangan do benda singokidan do jeljel jontun anrukku dakuteji, do bo sanna passijan aninji a d’ong arrongte. Ayang-tangan do saluan anrukku jumjumtenji, do aninji a onanji anrukku dimadteji; do singokidan kupp-tangan ambrij agadan jumte. Memenasijan anaga luadna j’adan a patud a langka gatasite; szddamelen a passijan bias j’adan a s’ing lingan a s’in ubte. (Jisaya 11:6-8). J’ee-lenji man’oihan batte barij-lepo, bigrda janabanji aogandiben abmele? Kaninna ate man’oihdam do bigrda janabanji abmele sakki atiyben.

Aboi sanabyun-atanimyim desadakule do bo bigrda desan sanunaben asan yirai. Sanumaranji a d’ong bangsale hanghangan deleji, kuddub mandranji a d’ong a kadhiben asan banahang deleji, do togi batte. Bindo agante sanumaranji gardaba yiraiji, aninji a d’ong bo surda janaja batte jaleji.

Sanna sanna passijanji sanumaranji a d’ong jaleji, tarban a silinganji tiyle mana’angan batte a mukka linganji. Inslonji ate s’ingan a lanankaba saring tarjubsin batte janaja tiyleji. Gardalingan a mandranji lanagadan batte baran lumleji. Agante sanumaranji kan ate gijleji, iten a bara lumben dete kun ate aninji karidaleji. Abigardan aninji pasijanji a d’ong terdale kurkurtamle dakulenji. Aninji aboi janibjib bereji agaja gardan abmele adsanuneji aninji tanimyiman batte barij deleji. Kun batte aninji kuddub akardibanji sartudle a desanji yerlenji sanabyun batte.

Kitungle Jisu ordarba yiraiten, a tanimyiman absuiben asan. Ayengan amandranji a d’ongan bo maneng a tadleji okiy bo maneng anin absuile. A beramanji amang janang anin asurda tanimyiman absuile. A tanimyiman, ordarlingan sanabyun panglai. Sanabyun Raja a d’ong bo tagor j’ee-ben atiylenden, j’ee-ling-ben hadab asanabyun ahangte. Kan a sanabyun birindabenji, desa-benji do ordaran akuddub lingan sanabyun barij dakute.

Tanahimdam Kitungan a onagji, garberba ordar-lingan sanabyun adeben abmele. Do Sanabyun a Rajan abmele gadlamba, Jisu Kristun, bigrdanji. Bibolan a gamte ambrij amben janang anabsitta ahangte, “Anabmaina maranji man’oihdam”.

Okiy Kinolbe absele: “U’a-len Kitungan do Gamangtung Jisu Kristun saring asuyeman do sanabyun debente” (Episi 1:2).