Sep 02 –JIRUSALEM A SANABYUN!

“Yante gamle Jirusalem lingan sanabyun dete, kan apsele garberba: “bute bute d’ong-nam timyimteji, aninji banangsan hangteji. (Sanenken 122:6).

‘Jirusalem’ gamlenden Sanabyun a gardan. Sanabyun Jirusalem saring dunglen Juda do Samariaba do kuddub ordardesaban adule.

Janggardadage a garamgaman, Jirusalem j’ee-ben gadlamte. A garamgaman Rajanji a Raja do Kitunganji a Kitung, j’ee-ling-ben dakunaben dete. Anin j’ee-ling-ben sanabyu Raja ambrij dakunaben dete, egale jirusalem-len anlen ampara adakutenan ambrij!kuddub-ben, butente Kitungan a sanabyun sandungte, anindaman sanabyunlingan daku orde eja ogandiben dete. kan sanaisaina sanabyun dakuben ate, do sanabyu-lingan m’engnaben do Kitunglingan a dakunaben dete.

Jirusalem a garda gijgijba-kan a gardan Raja Daudo anindaman abmele gabdil-le, Jibusiyanji a d’ong anamdungan adelen atikki. Do a d’ong anurungan adelen atikki, Raja Solomon, Anin Kitungan abmele ganugudam a sarebasingan gabdil-le. Daniel a kirdikin rile kun marid sarebasingba mukale senkenraeten, yagitara bo denalingan. Nimiya kun sarebasingan bangsale bargutul-le kuddub gardalingan.

Bindo, Jisu Kristun ayiraitenan adnan kun ganugu sarebasingan papwrling do adurdan dakule. Anabkalkalan batte mandranji dayergule aninjidaman ayirleji asan ganalu deleji. Parusinji do Sadukinji abhanalingji aninjidaman ambrij. Do ateng Kitungan a tumadgiymarji a d’ong areng-ling tambarle tuableji Jirusalem a tagorling. Agante Jisun Jirusalemba gijgijle, kun gardan abmele anin edaneting: “Bogad amben kan ate a galamlenden, nam adenaling, kun batte amben sanabyun a hangte! Bindo nami kan kudduban a soso daku mangben saring. (Luk 19:42).

Iten Jirusalem a rajam ahiman-nami? Kan arajam-ling bebaran do melgijben abmele ganalamdete nami. Kan aboi marid desan gamle ganalaman dele asan kuddub ordaran a mandranji tette yirteji. Tette ateng janabanji taminan dete oliban anibanji, yangamte d’aan ahangtenji ambrij, Jordon saring do Samarianji a senda-da panangan dete. Etigoi bigarda bigarda a samanaji taniman dete do tarbanji ja tanimandete Israel maranji abmele. Nami Jirusalem abmele gijgijba do garberba.

A judanji derna ambrij Jirusalem aboi marid dakute do Messiah ayirtaih ayamling sanabyun dainate. Kunina ate Judaji a garberan nami janang. Kunina ate Papwr anosaij-lingan tumadgijmaranji a berna, kunina a Jirusalem anadtabme dete tabme ruanangan do tabme ordaran ganabdilan dete. Tanahimdam Kitungan a onagji, barij j’ee-ben batte Jirusalemba gijgijben dete.

Okiy Kinolbe absele: “Kanti-namji alungan sanabyun de-ete; rajasing-namji erabmuij de-ete” (Sanenken 122:7).