Sep 02 –Jerusalem laga shanti!

Psalms 122:6 jerusalem laga shanti nimite prathana kuribi: apuni laga jun bhal bhabna kuri ase tai khan ke uthibole dibi.

Jerusalem laga motlob tu hoile shanti ase. Shanti Jerusalem pora ula tu Judea, samaria, aru itu pura prithibi te pabo lage.

Aru atma phine pora saishe koile, Jerusalem tu apuni khan laga mon hi hobole lage. Itu laga motlob tu raja laga Raja, aru isor laga Isor, tu apuni laga mon atma chulabole lage. Tai apuni khan laga mon te raj kkuribo lage shanti laga Raja hoi kene, kile koile amikhan laga Jerusalem tu ami khan laga mon hi ase. Shanti laga Isor jana manu khan sobbi jani thakibo lage ki ami khan kote pora shanti pai. Itu nimite apuni khan karone zaroori ase ki apuni khan shanti laga rasta tu Isor logote bisaribo lage aru tai jinika itu prithibi te thakishe inika hi amikhan bi Pormeshwar laga kotha mani kene thakile amikhan bi shanti te thakibole paribo.

Jerusalem laga desh ke sabi, itu desh ke raja david pora banaishile, jebusites khan ke ulai diya pichete. Aru tsi pichete raja Solomon pora kiman sundor mondir banaishe, aru Daniel tai laga ghor laga khirki khuli kene mondir phine sai kene din te tin baar puja kuri thake. Nehemiah pora bi itu desh te aru ekbar wall di kene boundary banaishe.

Hoilebi itu desh tu tai laga bhal tu khotom kuri loise, Jisu Krista laga homoi te. Pharisees aru saducees khan bishi biya niom chulai thakishe aru itu pora hi tai khan laga atma tu komjur hoi thakishe. Aru bishi Isor kam kura manu khan ke pathor pora morai thakishe jerusakem laga rasta te. Jitya Jisu Jerusalem ke saishe tai kandi kene itu desh nimite mon dukh kurishe: luke 19:42koise shanti nimite ki lagi ase koikene aji apuni khan buji bole parile bhal asile hoilebi! Hoilebi apuni bujibole naparibo!

Aji Jerusalem kinika ase? Itu business kura laga ekta jaga hi hoishe. Itu ke pura prithibi pobitro desh koi kene jane aru sabole mon jai aru alag alag desh pora ahi thake. Itu pora hi bishi poisa kamai thake. Krus aru rosaries olive gas pora banai thaka bi bishi bikri hoi. Aru Jordan laga pani ase koi kine bottle te bi bikri hoi thake. Bishi noksa khan Isreal laga itu bi bikri hoi . Jerusalem ke sabi aru prathana kuribi kile koi le Isor laga prithibi laga sapha jaga tu tai khan poisa laga bazaar banai ase.

Jews kan pora Biswas kure ki jerusalem laga desh tu  pobitro hoi jabo jitya aru ekbar Jisu itu prithibi te ahibo. Aru itu prathana jews khan pora aji bi kure. aru itu vision tu old testament khan laga prophets  khan pora bi dikhishe, ki Jerusalem tu nuton hoi jabo jitya notun swarg aru notun prithibi hobo. Oh Isor laga bacha khan, apuni khan bi Isor laga notun Jerusalem ke sabi aru itu nimite prathana kuribi.

Aji bhabna kuribole laga pobitro kotha tu hoile psalms 122:7itu pathor laga bera bhitorte shanti hobole dibi aru bachai kene rakhibi.