Aug 30 – Mang-ling-Nam sattan ganijgij-len daku!

“Iten asan gamlenden asanggem-ling-len a yeraian kan a surda ompun a temangban iteja ranapti-len agassa, orde iten a lumben dete, kanate anlen aggalamai; Maih mang-ling-Nam sattan ganijgij-len daku” (2 Birinda 20:12).

Jiyasapat aboi Judaji a Raja dakule. Anin Kitungan a d’ong ateng timyimle do amang-lingan derdernete. Agante Amman a mandranji do Ammanianji abumung dunglen sanunaben asan yeraiji, anin adgalamad iten lumben dete. Anten asan a uggaran yuryurneten.

Bindo, anin Kitungan amang gijgijle garbernete. “Gija, ayengan a danen Aman d’ong-len tiyle, kun a dane-Nam saring d’ong-len gongle a szdben asan aninji yerre yan a dultaniyan tiyalenji; E Kitung-len, Aman kan a mandranji a d’ong abbitsarae po? Iten asan gamlenden asanggem-ling-len a yeraian kan a surda ompun a temangban iteja ranapti-len agassa, orde iten a lumben dete, kanate anlen aggalamai; Maih mang-ling-Nam sattan ganijgij-len daku” (2 Birinda 20:11,12).

Anin erkadab-ling-ben Kitungan amang gijgijle anamnaben abmele barij Juda desa-lingan gadlamlaji. Bar Juda maranji Gamangtungan a sanayaman a hangben asan aninjidaman rukkulenji; Gamangtungan a d’ong a saijben asan Judan a kuddub garda saring mandranji yeraiji (2 Birinda 20:3,4).

Tanahimdam Kitungan a onagji, anamna batte garbernaba birindabenji batte do kanakalan ayam-ling Kitungan amang gijgijba amben daman radudamnaben dete. royongan pangle birindabenji batte garbernaba. Birinda-ling-ben agante anamle agarberten, amben daina ahangte.

Agante tonaile do tonai banno maranji birindabenji a d’ong a tonaiben yertaji, kuddub-ben anamlen garbernaba yagidinna sikoija. Rumangdaman aberna kinsodan do ramengan anamna-lingan gobteji. Agante birinda kuddub anamling garbertenji, alutenji ajontunji ja gobleji. Anabyagi denna-ling, Kitungan bo surda daina tiyle a d’onganji do kuddub birindanji bo surda daina hangleji.

Kun ambrij, agante Jiyasapat Rajan Kitungan amangba gijgijle, anam-ling garberneten, kznkznan kznle abgugueten, Kitungan enegoi barale do asanggem-maranji aninjidaman sanule ads’i-dam-lenji (2 Birinda 20:22). Tanahimdam Kitungan a onagji, ambendaman Kitungan amang gijgijle anamle garbernaba birindaben abmele. Eteden amben dainan ahangte.

Kinolbe absele: “Kuduai kuduaianji a Gamangtungan  anlen ampara daku; Jakub a Kitungan baradturna-len” (Sanenken 46:11).