Aug 29 – Hanangna maranji ead-meba!

“Anten asan kuddub desan a mandranji a d’ong hanangan tiyan tiyle…..” (Mattiu 28:19).

“Hanangna maranji ead-meba” a berna a tanakud beran a hangnamaranji a d’ong oblingle ruangan endrang eren adnang. Anlen abmele ja, kani na ate Kitungan obpungaiten. U’u. Jisu Kristun abmele hangnamaranji atengben dete. Kuddub ordarlingan hangnamaranji barijben dete. Kristulingan a orungben rojoldam, bindo hangnamar abmeben jugardamdam.

Jisu Kristun hanghangmar abmele gabdil-le. Anin gamle, “Sandungihba.” Anin hangnamaran abmebe susueten anabhanan, amanaridan do abaran batte. Anin hanghangetenji yangan garbernaben dete do yangamle garberan dete Anin hanghnagetenji. Kun sattang ted. Anin janang Getsamoni kudttalingan garberling do a garberna a mandrengna batte a d’ongan sandungleji. Anin hanghangle iten marid-dam. Anin marid mandrengna abhanaling do kun asan Anin a marid mandrengna batte sandungleji. Anin tanimyiman janang hanghangle. A mihamang arakad-dang-lingan la-le do a surda tanimyiman absuile.

Nami, ateng hanganmaranji do Pastronji Kitungan a boantan gamle dakuji. Bindo kan kuddubanji, saring butente j’eelen timyimte u’an orde guhangan ambrij mandrengna abhanale agorlangte. Ateng hanghanganji daku, kun abmele j’eelen iten saite, tanagormarpo sakki mandrengna adhanaten ambrij. Anten asan Jisu Kristun gamete a hangna maranji hanghangmar abmebaji Kristun ted.

Agante Jisu Kristun a bara susueten, Anin miygal hangana maranji sedale do jajzngante ayam atikki, yakurdigalji deleji. Etigoi bosoa do bokurdi mandra deleji. Atigoi kuddub ordarlingan hangnamaranji atengle (Anappai 6:7). Bibolan gamte hanangnamaranji abatengba. Hanghangan batte  bibolan anabgutulan dete bar mandrengna anabhanang dete. Hanghang aboi janggardan-dage adarakuna, Jisu Kristun batte anabgutulan do amadrangte abai ambrij, mandrengna kambo-ol, kuni na ate tarda ayam dakute.

Kan hanangna maranji saring Pol ganabdilan dele, Anappai maranji, Timoti do Titaso kan aninji murda-dage dakuleji. Agante Timoti amang edolle, Anin aboi “Kristumar Timoti” gamle adgamad bindo, anin gamle “Timoti, dernadage a onan” (1 Timoti 1:2). Tanahimdam Kitungan a onagji, agante amben Kitungan abmele hanangnamaranji agadilte, tanimyiman batte lumben dete do aninji janggardadage a pasijangji gamle a ogandiben dete!

Kinolbe absele: “Bogad di dargam mandran apsele amben a tanimyiman delenden, kan batte, aninji Anin a hanangna maranji na gamle amben abmele kuddub mandranji galamteji” (Jon 13:35).