Aug 28 –Aman a Iylaian a Tangor-ling!

“Marid Janggardan barijamte, gamle ayengan a Gamangtung Jisun tangor lingan aman a iylaian adnang mangba-nam abgijdamneten, Anin na d’ong-hen mangba-nam appai-ihten” (Anappai 9:17).

Ananiya anappai Pol a d’ong bo jaru beran abahimaten, ‘egale aman tangorlingan yir-rai’ agante Sol anab-kanalkalben dungle adnang Kitungan a d’ongan hamle. Egale anin Damasikaba yir-rai, a bumung ruangan saring tan’aran labsolai. Kuni na ayamlingan Kitungan Sol a d’ong Pol abmele.

Amben u’an a tangor-ling a haten? Amben Kitungan a pasijanji asangimling ayirtepo do enegoi amben Kitungan a d’ong abdukatepo? Amben anangan a tangorling ahatepo? Kitungan itsumte hamben do rapduben abmele.

Bo buhang lebun ahangben asan Dubai yireten. Anin a yirben abmang, a gardi a s’in melgiyle Chennai-lingan. Kun ayamling, jajingante gardiji somudroban yirle a garbernaben oskailingji kun a orublingan. Kan buhangan ja aninji ampara yirle do garberlingji. Agante aninji gobleji do garbertenji ayamling, Marid Janggardan a ranapti labsolai amanglinganji.

Ayengan a buhang Dubai ayirben dakule anin Janggardan do togi batte barij dele. Atigoi jajingante ayam sikoija janggardan barij dakule amanglingan. Amben agalamtepo iten dele atanakud lingan? ​Ayengan a buhang Dubai yirle barabling lebun ahangben asan anin amonan bandalen do anindaman surpid-damle tarda-ayam abmele Kitungan a boantan dele do etigoi ateng pwrardanji hangle.

Tangorben Kitungan amangba surpidba do amanglingan dirdirnaba. Ateden anin tangorben rojol abmete. Kun sattangted. Kitungan amben ampara yirtai. Tangsoi adhane.

Tanimyiman batte Mojes Israel a pasijanji a d’ong gamle, “….Engale a u’an anin a onan a d’ong lakudle urungte, ettele Gamang Kitung-ben amben a kuddub god lingan kan a darakunan sikkoi ja d’ong-ben lakudle urungaiten, antate amben a gijle; ….Amben a tambusinganji a tangten a darakunanji a saijben asan Anin mukkaba-ben yerre; do amben a hanagodan apsuiben asan togalan adnang togin batte do tamban adnang taruban batte abmang abmanglen yerenten” (Babujuanaber 1:31,33).

Tanahimdam Kitungan a onagji, amben Kitungan a jardin saring a sagailepo anabkalkalanji do ateng tanungjinganji batte? Amben sanabyem lingan daku orde etja kun akuditenpo? Derna batte Kitungan a jardi lingan yiraiba. Anin tangorlangten janardin manaridlingan.

Kinolbe absele: “Iten asan Gamlenden Gamangtungan mukkaba-ben abmang abmanlen yerte, bar Israel a Kitungan amben a sanandung mar dete” (Jisaiya 52:12).