Aug 27 – Gamangtungan Tan’aran Danisamge!

“Atenganji gamteji, “Buten d’ong-len banangsan apsuite?” E Gamangtung, mukka-Nam a tan’aran lanangka-len adpuanga” (Sanenken 4:6).

Anlen ampara Kitungle daku anin kuddub banangsa janabanji sarigoi tiylangten. Anlen agaja edanabented ordardage a mandranji a gamteji ambrij, “Buten d’ong-len banangsan apsuite?”

Kitungan anlen abmele gupamarge. Anlen anin a murkundardanganji, anlen ersuige ad-delangne. Anlen adnadjatalangne. Tumadgijmar Jirirmiya gamete, “Bindo Gamangtungan janardi Kitungan na; Anin Am’eng Kitungan do Tarda Ayaman a Raja” (Jirimiya 10:10).

Man’oihdam maranji, Kitungan anablumaran-na, buteten maimaite a tanimyiman, butente Anin ampara janardilingan hatenji do ayengan a mandranji Kitungan a mukka a tana-ar hangteji. Bibolan gamte, “Aninji mandranji a d’ong aninji a baruban gudingteji, bar tetten tungna jana kanubanji kubteji; Aninji ganingda lingan saring a bittin do lakkij lingan saring a sanoso bittin jumteji” (Bagujuanaber 33:19).

Kitungan a pasijanji a d’ong abietenji ambrij ganaga tiyte, ayengan ordaran anabsittan batte ganugan ambrij tiyte. Anin a mandranji a d’ong lakkij liangan saring a sanoso bittin tiyte. Anin a mandranji a d’ong absosole dakule ordaran a mandranji saring bindo anin a pasijanji a d’onganji sayamte.

Kristu ganalam maranji ateng 19 do 20 Satapdi lingan janabanji ganabdilan dele. Aninji Kitungan a d’ong abantonteji amandranji do Kitung lingan sanayamgarber marji dakule, a soso janabanji abgijtale. Agante bo mandran a derna amanglingan dakute do rojol j’e-e batte amang lingan butente saite, Kitungan a d’ongan tiyte a guluminsinlingan saring ganalaman do banuddin do absittate.

Ordarlingan, America a galam-marji aparmangta rocket batte angaiba yirleji do eiletanaganji. Kun angaitaban bibolan apangben akkaridaedji. Kun asan Kitungan a d’onganji kayatinge adnabsead.

Tanahimdam Kitungan a onagji, amben banudi, ganalam do mananilingan asuipo? Kitungan amang gijgijba Nami. Bibolan gamte, “Bindo bogad mang-ling-ben buteja banuddin sanaisaijan delenden, kuddubanji a d’ong eramuiloge a tiytiylangtenan, do akkaihkaihlangnen, a Kitungan amang saring garberete, do anin a d’ong taniyan dete” (Jakuban 1:5).

Kinolbe absele: “Bar yante gamle amben iteja abmele er asuilabe, hadabloge do barijdam a dete, kun asan ateng-ayam-sanayen barijloge a baran abojoraiete” (Jakuban 1:4).