Aug 25 – Janattidage Arengan!

“….Kitungan batte saneda do ateng janattige dele, Bar ambendaman am’eng arengge Janggardadage s’ingan a deben asan ganutulan deba, marid buyanji deba.” (1 Pitor 2:4,5).

“Janattidage Arengan”, Gamlenden ira ambrij, ramengan amadan do bo janattin rudin kan ambrij a janattinji ganalaman dete. Bindo, kan arenganji mandrenganan agasa. Mandrengnan asan arenganji janattidageted. Janattidage Arengan abmele anappai Pitor gameten. U’u, Anin Mesiana, a kune rengan radu gaijitalan (Jisaya 28:16). Butedeleja timyimle do dertenji aninji Janattidage Arengan-na aninji abmele.

Pharises do Sadducees Jisu Kristun a d’ong adjaedji. Judanji gameleji Anin a d’ong arakad-dang lingan tanangan de-ete. Murdabuyamaranji do danemaranji Anin ad’ong Ruminji a s’i-ling surpidleji. Anin aboi arengan dakule gusungmaranji amang saring janaja adead, bindo Anin aboi a gaijitalan areng do akune arengan ambrij dele dernalingben. Amben janang amanglingan ganutulan adele Kitungan adarakunaling.

Tanahimdam Kitungan a onagji, Jisu Kristun aboi a gaijitalan ambrij mandrenganalingan. Agante Anin batte ganadilan delai kunina ate Janattidage Arengan, amben janang Janattidage Arengan. Mandrengnaben adtakude asui akanalkalanji batte kan ordarlingan. Erahid mandrengna mahai hangtabe. Amben aboi Janattidage Arengan adete Kitungdagelingan tarda ayam.

Anabpungge lingan, ruandage a Jirusalem aganutulan. Bibolan gamte, “Gardan akintalan a ganaijitalan dile janab karran janatti kilaijaran batte anabtol-taramtaman dele” (Anabpungge 21:19). “A tan’ardaman a karran janatti kilai-arge, manan, ira arengge arel arengan ambrij gittale” (Anabpungge 21:11). Badlohim-maranji Janattidage Arengan ambrij ranabangan dele.

Agante Solomon Sarebasengan gabdil-le, arenganji anabaldungan dele, rayle langaabmele do gutulben abmele sabrileji. Kun ambrij, arengan abmeben asan d’ongben ruangan a mandrengna, Kitungan tagorlangte kanalkalanji do kanudingji saring, manaridlingan bangsale do abdile atakudle areng Zionlingan do Tabme Jirusalem.

Kinolbe absele: “D’ong-hen Kitungan a taniytiyan a tam asuyeman ambrij, bo banuddi abmang gusingmarge hen ganaijitalan sabjalai….Iten asan gamlenden itente a ganaijitalan manan, Jisu Kristun na, sanabjan dele, antate sadan sadle buteja bzgrda ganaijitalan rapti adsabjae” (1 Korintia 3:10,11).