Aug 20 – Enok Kitungan a d’ong abm’oihle!

“…iten asan gamlenden Kitungan anin a d’ong ordaran saring urungeten. Gamlenden anin a anurungan a purban, ‘Aman Kitungan a d’ong abm’oihle,’ gamle sakkin anin hangten” (Ebri 11:5).

Enok Kitungan a d’ong am’oihben ate sedale amandrengna lingan kun ate a sengsengan dakule. Kan ate, anlen gijle a raptitabe aberna. “Hen iten lumben dete Kitungan a d’ong am’oihbe? Yangam hen Kitungan a d’ong abm’oihle raptiai? Yangan m’eengle Kitungan abm’oihain?”

Derna na ate tagoran Kitungan a d’ong abm’oihbe abmele. Kun asan anidolan dele “derna batte Enok” gamle (Ebri 11:5) gijlabe. Bo denna Enok Kitungan a si’i hamle derna batte. Kanina ate Kitungan idolmar do anbtakudmar dernalen abmele (Ebri 12:2). Anten asan Enok Kitungan asi’I hamle dakunete a derna rapdule derna batte. “Kan a Kitungan Kitung-hen na tardaayam abmele. Karahidhen indranggijahen abmang urungten” kunina ate a derna na.

Kunina ate Enok a derna itente a derna batte anurungan adelen ate. Bibolan gamte kun a dernana ate anabdaina derna ordarlingan (1 Jon 5:4). “Derna batte m’engte” (Romi 1:17). Dernana anablu tiyte mandran ad’ong (Mattiu 9:22, 10:22).

Enok Kitungan ampara dakuneten a derna asan. Derna ‘Ayengan a Gamangtung ordaran gabdile Anina mandran batte edungte do mandran batte basute’ kunina ate surda derderna. Ijapo? Enok, Kitungan batte abasule asan tanimyiman do anablu hangle Kitungan amang saring.

Egale Gamantungan batte halingji, a derna marangle okij marangle. Yan abangsa kan ate armukka armukka Kitungan batte arberlenji ate! Kun a derna asan Kitungan a d’ong abm’oihle dakunete Enok, anin a d’ong anurungan dele anten asan anin karahidan adgijad.

Bogad amben Kitungan amang a derlenanden, amben janangan Kitungan a d’ong abm’oihte. Kitungan ja sakki tiyte amben abmele. “Anin barij s’ing-ling-Hen dernadage daku” (Danisam 12:7). Mojes abmele Kitungan sakki tiyle, “Anin j’e-Hen anogandin ambrij abo mandran na” (Anappai 13:22) Daudon abmele, “Jarditen nab o Israel maran, Anin amang lingan janoldan agassa” (Jon 1:47) Nataniel abmele do “Anin ambrij er dusa do roitad do Kitungan a d’ong bantongten  do ersz baran saring larren dakuten a mandran ordar lingan buteja agassa” (Ayob 1:8) Ayobo abmele.

Tanahimdam Kitungan a onagji, kun ambrij Kitungan amben abmele sakki tiyben dete ijapo?

Kinolbe absele: “Boanta-Hen gijba; Hen Anin a d’ong tandamtai. Saneda mar-Hen gijba, Anin amang lingan j’e-Hen m’oihte, Anin amang lingan Janggardan-Hen dakkulai; Anin bzgrda jattinji a d’ong bitsara bernan ablengte” (Jisaya 42:1).