Aug 17 – Amben Bute a d’ong Abm’oihte?

“Bindo bute bute anlenji radudam, anlen er t’ul maranji a banalainji a sayeben dete, do abm’oihdamnaben adde-e” (Romi 15:1).

Amben Bute a d’ong Abm’oihte? Amben bute a d’ong a dirdirten? Amben bute amang adrijten? Bute bute ate aninjidaman abm’oihtaji. Bute bute ate bigrdaji a d’ong abm’oihtaji. Bute anindaman abm’oihte anin ansadamten. Buten bigrda maranji a d’ong abm’oihte atanakudlingan kanalkalan hangteji. Bindo, Kitungan a d’ong abm’oihtenji amandrangji dile tordong man’oih lingan dakuteji.

Pilat a d’ong gijba! Anin onla maranji a d’ong abm’oiheten (Mark 15:15). Anin ogangdile onla maranji a d’ong abm’oihlaienden hen surda baran hangtai gamle. Anin ogandile, ‘mandranji itsumleji Barabban a d’ong amdungbe. Bogad hen mandranji a d’ong abm’oihlaenden, aninji bernahen amdangteji do kan batte, hen surda bara hangtai. Bigrdanji saring taniytiyan hangtai do buteja d’onghen ejaja adgamihenji ambrij kan dane bara lumtai.’ Anin Jisu Kristun a d’ong adnadm’oihan. Anin ogandile pede Jisun a d’ong abm’oihben asan bindo kan ate hangdranted gamle ogandieten.

Ogai! A purban a kamboling anidolan dele atanakudlingan Pilat Kanalkal-lingan galule. Anabdusan batte anabkalkalan dele, anin aboi keka maran ambrij edungle dakunete. A tanakud lingan anindam kadhiddamnete tarda lingan ur-re. Pilat ambrij mandranji a d’ong abm’oihle Kitungan a d’ong abdukadong. Tordong ayam Jisun a d’ong abm’oihba ayengan atanohim batte mandrengna daku do ayengan amandran anlen abmele arakad-danglingan tiydamnete.

A jardina, dukriben abm’oihba, pasijbenji do kulambenji. Bindo Kitungan a d’ong abdukale ordaran batte tanimyiman adakudong.

Bo dena, bo surda sanumaran a dukrin a d’ong gamete kan alin hen do gardimarhenji abmele tiylen bindo a dukarin asale. Tanimyiman batte gamete, “Dukarinam ambrij, jajingte danebara hen manglingnam daku. Bindo, hen d’ongnam adnam’oihle Kitungan a d’ong adnad-dukai.”

Mandrengnaben kan ordarlingan bobardiabmele sattang maiai. Bindo amben Kitungan a rajamling mandrengmadtang sikoija ame’engte. Amben Kitungan ad’ong orde mandran a d’ong abm’oihte? Tanahimdam Kitungan a onagji, mandrengnaben Kitungan ad’ong abm’oihben dete.

Kinolbe absele: “Iten asan gamlenden nami hen mandranji a sanamsaman a hangben asan saijtai po? Orde Kitungan a sanamsaman saijtai? Orde hen mandranji a d’ong abm’oihben ertai guitai po? Iten asan gamlenden bogad hen nam ja mandranji a d’ong abm’oihlaienden, hen Kristun a boantan addeai bih” (Galatianji 1:10).