Aug 13 – Anabgugu lingan Man’oihan!

“E roitad maranji, Gamangtungan amang lingan m’oihnaba, iten asan gamlenden sanesenan rojol-j’e maranji apsele tungnadam” (Sanenken 33:1).

Bogad danuka bimbiman pangaitenden, mandrengna si’ite do mandrengna asuite, man’oihan aboi regaman ambrij. Ijapo? Anerdaka j’ee sanamangan tiylangten, anerdaka mukan dakule do mandrengna abatengben dete.

Bo doctoran yangam canceran yirtai mandran amangling kun abmele melgijle. Anin rabangle kan ambrij bo surda kanalkalan abrina, bimbiman, danukan do kanudin kan kudduban batte bimbimanji yirtai. Anin rabangle danuka batte abumung birinda palangte, dunkrin batte orde tanongba batte panalangan dete, ettigoi bebaralingan jangan dete. Kun ambrij d’ongonglingan asun saring surda canceran abimbim yirtai enegoi tundra angai orde gulji angailing.

Janardi man’oihan anabgugu batte kznkznan do tongsengan dete. Agante amben a m’oihten anbgugu batte Kitungan j’eelinben, saring kuddub danukanji dunglen yirte do Kitungan a tanurdun manglenben yirtai. Anabsamangan as’i-lingan daku. ijapo? (Malaki 4:2).

Tagalda aditenan ayamling man’oih j’ee batte Kitungan a d’ong abguguben dete. Butente dakute amanglingan anabgug abmele atanurdu sanaisai. Kuddub ayamlingan, uailoge gamba, “Kanate Gamangtungan a gabdellen a dinna; anlen kani dinna lingan a m’oinaba do aerdikanaba” (Sanenken 118:24). Bogad amben alumlenden, amben erdikalen adakute.

Man’oihan batte Kitungan a d’ong abguguba mahangle kznkznan do tongsengan batte. Bibolan gamte, “Sellenten t’od-ling-len man’angan do al’ang-ling-len man’oihan a kanenkenan batte barij dele. Selleten jattinji amang lingan mandranji gamleji, Aninji abmele Gamangtungan surda baran lumten” (Sanenken 126:2).

“Iten asan gamalenden Gamangtungan apsele man’oihan amben a ranadun” (Neemiya 8:10). Anten asan, dernaba ayengan a Kristun ranadule amanglingan daku gamle. Kuddub itsuman batte, gamba, “D’ong-hen abraduten a kristun batte kuddub baran rapti lumtai” (Pilippi 4:13).

Tanahimdam Kitungan a onagji, tiridsilen Kitungan a d’ong abguguba. “Amben sarebasingban ganarber lingan s’i-benji teredba, do Gamangtungan a d’ong senba” (Sanenken 134:2). Kan ambrij m’oihnaben dete. Kitungan sanaisai mangben saring m’oihlin dakunaben dete.

Kinolbe absele: “E kuddub ordaran a mandranji, Gamangtungan apsele man’oihan batte kenba; kanenkenanji batte do uai-sarrangan a man’oihan batte Anin a d’ong senkendraba” (Sanenken 98:4).