Aug 11 – Rumang baran batte Anerdikan!

“Iten asan gamlenden hamkulmaranji amang saring dajing kulmanji ateng arding sarrangle gule dunglen yerreji, do dajing dajing rodotdong maranji, dajing dajing garde maranji sanamangan hangaileji. Bar kun garda lingan karran man’oihan dele” (Anappai 8:7,8).

“Surda man’oihan” abmele iten daku iten dete gardalingan? Asumaran samangte, er marid janggardan dunglen yerrentenden er bangtonglabe adakuna a man’oih. Amben er kapdablingben man’oihan hangben dete Marid Janggardan saring bar janangan Janggardan a J’on hangben dete Marid Janggardan saring. Kan Janggardan a J’on Janggardadage a ranaptin tiylangten. Anlen dane hangle dane baran lumben dete.

Iten asan ateng mandranji man’oihan adhangaji? Bimbiman do er tu’ulan a d’onganji anordin adte’e biridalingan do Kitungan amanglingan. Ateng ayam, mandranji adimatinanji ayamling. A mandrengnalinganji man’oihan addakuead.

Agante Jisun Kristun orarba yiraiten, er disamdage a rumang baran lumle. Bibolan gamte, “…..yante gamle Kitungan Najarita Jisun a d’ong Marid Janggardan do ranaptin batte absardiagodle tabngijeten. Bar Jisun bangsa bangsa lanuman lumle, duaih suman batte anabasudan a delen a kuddub mandranji a d’ong absamangroi gorjang gorjang endungten. Iten asan gamlenden Kitungan Anin ampara dakuneten” (Anappai 10:38).

Tanahimdam Kitungan a onagji, bogad Jisu Kristun mandrengnalingben yiraitenden, bimbimanji do er tu’ulanji dungle yirte. Beramaranji ja sosote. Sonuman manglingben adyirai do ajumbwrnaben, kadhiben do absiben sattang. Bindo Kitungan sayambenten kuddub lingan. Bimbimlingan, orde kuddub ayamlingan Anin jalaiten. Yan a man’oihan kan ate!

Bo dena, bo tonanan kukulingan ateng kanalkalan batte sobalingan yiraiten. Kun soban A tanakud dena lingan, arangaba yirrai garberan ayngben asan. Pastron a bablingan asi’n dakule do garberle adngan, bimbiman saile. Sanamangan hangle do sayu dele. Kitungan absamangle.

Kan a rumang barn Kitungan lumete, tette man’ihan dele pastron do kun inslon. Kun tonanan a birindan jangan m’oihlingji. Aten asan Bibolan gamte kun gardalingan anerdakan dele. Tanahimdam Kitungan a onagji, manglingben saring Kitungan man’ihan pangtai gardalingben.

Kinolbe absele: “Butente karahid maranji amang saring Jisun a d’ong abyerm’engle abdzeten, Anin a Janggardan bogad mang-ling-ben dakulenden” (Romi 8:11).