Aug 08 – Hoshiyar thakibi!

Matthew 24:43 kitia ghorte chor ahibole ase utu homoi ke ghor malik jani loise koile tai naghumai kene uthi kene bohi thakibo aru ghorte chor hobole nadibo.

Chor berai thaka homoi te te amikhan kinika uthi kene thake aru hoshiyar thake. Inika hi satan bi berai thake amikhan laga pobitrota tu chor kuribole, itu karone ami khan hoshiyar thakibole lage.

Bishi hoshiyar thakibi apuni khan laga pobitro jibon loi kene.satan pora hodai din apuni khan laga sapha jibon te dag lagabole kuchis kuri thake. Ami khan inika biya homoi lok napa tak bujibile napare ki satan tu amikhan ke hodai biya kuribole hi rukhi thake. Pobitro kotha te koi 1 Peter 1:15 Isor jun apuni khan ke matise, tai pobitro ase; itu nimite apuni khan ki kori ase itu khan sob pobitro  hobole lage.

Ekta atma laga girja tu din prati din te ag barhi jai thakishe. Bishi kom homoite itu girja tu dangor hoishe aru manu bishi pora janibole parishe . hoilebi itu pastor tu nijor laga jibon te pobito hoi thakibole napara hoishe. Ses te girja laga manukhan pora tai ke postor laga ppodh pora ulaidishe. Itu manu kun hi iman mon di kene itu girja ke khara kurishile tai ke tai nijor laga girja te prochar kuribole diyanai. Inika hoi kene tai laga jibon tu bishi biya hoi jaishe

Apuni khan bi nijor laga atma laga jibon ke loi kene hoshiyar thakibi . pobitro kotha te koi, 1 Peter 5:8 hoshiyar thakibi, aru thik pora sai kene thakibi, apuni khan laga dushman, satan hala kori kene berai ase, kunubake biya kuribole berai ase.

Satan tu bishi chalak ase, mitha pora khabole di kene phashai thake aru amikhan ke gadha te girai diye. Amikhan hoshiyar thakile aru Isor laga modot hodai loi thakile satan laga jal te naphashibo. Amikhan hodai din prathana kuribo lage ki satan laga saya tu ami khan laga jibon te nadikhibole.

Apuni khan tu prathana bi narukhi kene kuribo lage. Amikhan prathana te kitya bi komjur nahobole lage. Apuni khan laga prathana laga homoi tu ani jabole nadibi, itu homoi ke hi apuni khan laga hatyar tayar kuribole chulabi. Jisu Krista koishe Luke 21:36 hoshiyar thakibi aru prathana kuri thakibi, apuni khan itu khan pura tagot pai kene par hobole paribo aru manu laga chokra laga agete khara kuribole paribo.

Oh Isor laga bacha khan, hoshiyar thaka jibon hi hodai din jitya laga jibon thake. Judi apuni hoshiyar thake satan kitya bi apuni laga jibon te ghushe kene biya kkuribo naparibo. Judi apuni itya hoshiyar thakibo aha laga din te apuni Jisu laga barat te jabole paribo jitya tai itu duniya tea mi khan ke lobule ahibo.

Aji bhabna kuribole laga pobitro kotha tu hoile 1 Thessalonians 5:6 itu nimite amikhan humai kene thakibole nalage; amikhan hodai uthi kene aru thik pora sob jani kene thakibole lage.