July 30 – Silbanon a Derna!

“Silbanon batte asui bernan appaiollaben. Anin bo dernadage buhang, gamle hen apardetai. Amben antasuyem lingan erztnage dakunada” (1 Pitor 5:12).

Agante Bibolan kznoltabe er galam buhangan Silbanon a birna. Pitoron sakkibiran oblingte kun buhangan abmele “Anin bo dernadage buhang.” Silbanon tinne gijtabe do amben pede galamle araptied a abmele. Bindo, Anin aboi dernadage gamle anoblimgan dele kun batte j’e-elen edrakaten. Kanina ate anin abmele bibol-lingan adnidolang dele.

Nami, Kitungan dernadage amandran saite. A saiben abmele kuddub ordar-lingan a madan gij-gijle daku. Anin saile daku butten dernadage daku do Kitungan aranaptin amang-lingan abpungite. Raja Solomon ualete, “…bindo dernadage a mandran buten rapti rabangte?” (Bangsa Hangan 20:6).

Kan a denna-linganji amben asui dernadage a deben abmele kanalkalan a yangte pede. Kan ordaran a dane maranji kani kuni gamtabenji pede. Joldanaben asan janangan baitabenji, kan ambrij. ​Bindo, Kitungan gijgijle dakuten dernadage daku orde edja.

Bo buhang gamete, “bogad hen beedi, cigarette do etigoi bigda d’ongan absi’hiten ajanab timlahenden labaman pede hangtai. Bindo, hen Kitungan amangba dernadage dakuben dete. Anten asan, hen adtemai dukani-ling-hen kun ate Kitungan abm’oihe do bangsated, hen dukani-ling-hen jajzngante ate dakulai, ‘buttente Gamangtungan amang-ling derten anin anabsitta hangte.’ Kitungan absittaten.”

Etigoi bo buhang gamete, “Hen Police-lingan baratinai. Ateng mandranji mah’angtiyji. Anten asan kun bara dernadage lumai orde umdrengai gamle oganditai. Bindo ayengan a Kitung derna-hen gijle asan surda dane bara tijling.”

Jajznganti adnang, tanunjingan yirtai dernanam abmele. Bogad amben bo san-na bara-lingan dernadage a dakulenden ateng bara-lingan dane baran a hangte. Bibolan gamte, “Bar janang gumastanji amang lingan yante gamle dile mandra dernadage dete, antate sanaisai daku” (1 Korintia 4:2).

Dernadage saring, agante amben dernadage gamle ganalam dete, amben aninji a d’ong oblingben dete. Oblingbaji, ‘lagad do dernadage dakuna. Agaja dukadamdongne. Hadab a yamlingan Kitungan adainatabe” do amben ambendaman argadlamba. Tanahimdam Kitungan a onagji, ite kanalkal dakule janang orde ite tanunjingan yangle janang, dernanam rabraba. Kitungan ayam-ling, d’ongben abdainaben abmele adamdam daku.

Kinolbe absele: “karahidan sikkoi ja dernadage dea, bar Hen mandrengnan a raja-ranunnoban tiytam” (Anabpungge 2:10)