July 17 – Daniel a Derna!

“…aninji iteja dusan orde anardodan adrabangadji, iten asan gamlenden anin dernadage dakule do anin amang lingan anardodan orde danusan ganittan addead” (Daniel 6:4).

Kitungan dernadage, ayegang a kuddub mandranji Ad’ongan timyimtaji aninji amang derna daku gamle ganalaman dete. Ateng mandranji a derna abmele anlen gijtabe. Nami, Daniel a derna gijnete.

Bo ompu Daniel a danusan orde anardodam saile dakulenji. Kznsa marnaji amang sonuman a janggardan dakule a danusan asaiben. Aninji aboi kayating a mandranji ted. Bibolan gamte gobornor saianji Daniel apsele iteja danusan a hangben asan saileji. Bindo aninji amang lingan danusan orde anardodan adhagadji (Daniel 6:4).

Amanganji saring satan ahiman ‘Buhang-lenji a d’ong abdusaten’ (Anabpungge 12:10). Bindo Daniel Kitungan aganijgij lingan dernadage dakule. Mandran do rajan.

Iten ambrij Kitungan ajanibjiban? Kan ate ejajated bindo ‘Aman asui abmele dernadage dele. Hen ateng a lanangka tabngijtam’ (Mattiu 25:23). Agante Daniel babilonba anurugan dele, amangan saring Kitungan a derna gijle. Kitungan gijle aderna do er banda mona agante anin rajan amang saring aganaga adja-ad. Kun batte, Kitungan  ateng a lanangka tabngij-jeten. Ateng rajanji yir-aiji do adgijta-adji. Bindo Daniel ad’ong ateng a lanangka tabngijang dele.

Tanahimdam Kitungan a onagji, Daniel ambrij amben dernadage adetepo? “Iten asan gamlenden ayengan a mandranji Gamangtungan amang lingan rojol-j’en dakkuteji, aninji apsele Anindaman a ranaptin apsuiben asan Anin a m’odanji ordaran a kuddub maneng gijgijte” (2 Birinda 16:9). Rajan janangan Daniel a derna galamle. Anin Daniel ad’ong gudingle “Daniel, mandrengna Kitungan a boanta” do ualete, “Kitung-nam amang agankzlte, kznanji amang saring raplampo?”

Amben agalamtepo Daniel iten a yerbirete? “U u raja, todong ayam amengdakuna! Kitung-hen apisidiranji apailai do kznanji ato-od boodle anten asan hen ejaja adelen atimang linganji hen aboi lanagad mar dakule; do kan ambrij, U u raja, hen ejaja ardodbara erlanum manglingnam” (Daniel 6:21,22).

‘Derna’ aboi murdadage Kristu mandrengna lingan. Daudo edol-le ‘Aman along-uggar-ling-hen janardin saijte’ (Sanenken 51:6). Agante amben Kitungan amangba derna batte adakute do mandrangji amang ganugu Kitungan hangte. Baralingben dainadete.

Kinolbe absele: “Derna maran awr sanittan hangte, bindo ayengan a mandra bitti mar a deben karran abumengdamten anin panadradan hangte” (Bangsa Hanang 28:20).