JULY 14 – Gorjang Lingan!

“E tanimyim mar-hen yerai. Anlen gardan saring dunglen a yerre do gorjang lingan togalan a basunai” (Solomon a Kanen 7:11).

Desan a mandrengna gojangan a mandrengna derderte. Gorjangan a bananda desan a bananda na. gorjngan amandranji janang aboskainaben dete Kitungan ayirtahen abmele ejapo?

Purba ayamling ualenji gorjangba ateng Kitungan abara lumleji. Aninji ateng gorjanganji tagalda saring oruborub sikoija melgijleji, bangsa anoblingberan oblingle, kzkznan kznle do mandranji ad’ong Kitungan amangba orunlaji. Aninji dakunaben abmele ogij-ja darakuna adhagadji itegoi tagorlingan do bairaba togalan dimadlingji. Bindo, gorjangba adakuna atena Jisu Kristun ampara adakuna ambrij.

Gijja yangam Sulemiya a tanimyim maran ad’ong gudingte. Bibola gamte, “E tanimyim mar-hen yerai. Anlen gardan saring dunglen a yerre do gorjang lingan togalan a basunai” (Solomon a Kanen 7:11). Kun ambrij amben janang ad’ongan agudingtepo?

Gorjangan a mandraji lagad do bangsa dakuteji; aninji tanimyiman do anarayan kulamanji amang absuiteji; aninji ergalamdam; aninji bo tagor itente amben aoblingte jateji. Bindo, kun ambrij aninji lanamudlingan do jolda dernalingan dakuleji. Kan ate abaranamtepo aninji ad’ong Kitungan amangba aorungben abmele?

Bogad Jona aboi ahanangan batte ateng mandranji ayerje’elingji, ategoi amben ahanangan batte ateng gorjanganji ayerje’eteji.

Bo denna, Sri Lanka desalingan sanu dele, mandranji bangtongiydagge deleji. Ateng gorjanganji togi adakue. Sanumaranji abumung yirtaji, kuddub dangdaji ad’ong yamle do panle yirteji. Dangdanji dakulingden aninji amandranji abmele sanutenji gamle aninji ad’ong panagan dete. Kun ayam aua maranji sayamle do rabrable araptieji aonanji.

Kun ayam ateng mandranji adakuead Kitungan atanimyiman ahanang atiyben abmele, aninji abmele sanayaman do janajan adead. Gadinji ja agasakun ayam. Ateng Kitungan amandranji gadaban saring gorjangba yirlaji. Jajingante amandranji ate bigda desan saring yirlaji Kitungan abara alumben abmele. Ogandile giyba yan arumangdage ambrij ate kan amandranji abmele!

Anten asan, kuddub ranukunji gorjangan abara abmele oskainaben dete. Kuddub derna buhang tonangnanji gorjangba melgijben dete, Jisun batte dakule Kitungan abara lumben dete. Jisun gamete, “Bo sakkin apsele barij ordar lingan kuddub jattinji a d’ong rajaman abmele kan bangsa anoblengan anopungan dete” (Mattiu 24:14). Ejapo?

Kinolbe absele: “E Debora, Israel desan a yangan ambrij aman dzan dzlen adyeraien sikkoi ja, dijte ayam Israel a gorjang linganji mandran arikka dakule” (Bitsara 5:7).