Dec 02 – THU DEKES

Darshaner grandh 3:18 Thar ankina jhud lagadena Mar dai aan lelakan, thona seekvadi derochu.

Darshaner grandhema chajako 7 sabhama Lavodikayar sabhana Dev hecharikan seekvadi derocha. Dever nazar hachethin angaresarik chajethi vor ankima gokaan chajako kai cheni.

Dever nazar Lavodikayar padgejako athmik paristhithin dekrocha. Darshaner grandh 3 :17 vachanema thu bana naseeberan, bagar dikkeran, gareeban, andhon, vagado chajena malam karlesniju, ma saavukar kanan, dhanavanthudu kanan, manna kunsi kamchenikan thu kelerochi. Katho vo kukan athra andevo vege?

2 Corinthivalu 4:4 Dever sayaa ven chajako Christhur mahimar hach khabarer vajalo, viswasiyuna jhankeniju రైనా, yee dharathir Dev vunder daller ankina andho kidocha kan vanchacha.

Yesu bapu seva karrojana parisayavalan, saduukayavalan Ajji shasthrivo sada vunder athmik nazar andharema vethi. Vunden dekan Yesu Mathai 23:16 vachanema tham andharema vat dakaleval kan balayo. Andho ajjek andhena vat ku dakaler vacha?  Yee Lavodikayar sabha jhankan vajaler gharer nai renu Jako andharema vasarecha.

Apanen malam chajako saatuva char andher bagey, vunder mundag yek yenugun hubar kadan yenugu kurachko kevo kan puchetho, Yeklo taangen dekhen yenugu sthambhar nai chakan ko. Ajjeko puchadin jhallen yenugu yek badnar dakal cha kan ko. Theenmo kaanen jhallen yenugu vaal marer pankar dakal cha kan ko. Charmo thondamen jhallen yenugu lakadi kothrer koradir nai cha kan ko. Athmikvagi andhevur Yeej paristhi. Ephesivalun 4:18 vo vunder akkalema andharo ven, vunder katto dallethi, vunder barema Dev khyal karrocha kan dekacha.

Yek haptha Sadhu Sunder Singh yek gatlaparer kaalva daaten aarotho vor anki rathoi von deker vikoni, kassen katho massaj varas vona andharer guhama ghalnakethe jethi vu suryar vajalen deker butha vikoni.

Yee srustima kathraiko jeevarasivun anki rathoi ankithi dekerveniju banchu karacha kassen katho vo suryar vajalema avanaju jeevanen kaadu karacha.

Ajji jada dhyan Karen pado 1  Yohan 2:11 Vor bhayina dwesh karevalo andharema rena, andharema chalacha, andharo vor ankina aandi kidojako jethi vu katha jaarochkan vonaj malam cheni.