Aug 31 – Aman Lulunan!

“Etteden aman lulunan hangte….” (Daniel 12:13).

Yang asurda banabye beran kan a tumadgijberan batte Jisaiya Ajar ajar mihnum paddle, kan a berna d’onglen gadlamte, banabyen do sanayaman abmele. Angante amben asutaben 92 do 97 mihnum. Kitungan gamte: “Abantongdong, iten asan gamlenden Hen aman ampara daku”.

Angante amben anso a dakuten, Kitungan d’onglen gamle dakute Hen aman ampara dakutenai. Angante duaimaran mangbanben yirtai, do d’ongben absidben asan, Kitungan barokij gamte abantondong, Engale Anin anlen ampara adakun. Itendeleja kanalkalan, a berna babyelangten do abuyalangten. Buteja kan order-lingan agasa, er-bantonglabe. Sonuman pangtai banantongan a janggardan do batongte, do abkalkal-langten j’en-lingan. Kan ambrij ayam, bogad amben hamle adkulenanden Kitungan a d’ong do asidaiberan, banantongan a jangarda mangbanben adyerai.

Bibolan gamte: “Bindo barij tanimyiman amdungte banatongan, Butente amben amapara dakutenai gamle, Anin d’ongben rabrabte. Bibolan gadlamlangten Anin angaja adimadne orde adlulune, arabrab-ben asan. Bibolan gamte: “Anin j’eng-nam a jaloben asan, adnorde-e.

Butente d’ong-nam dandrabte, Anin angaja abmibmibdae. Gija, Butente Israelanji a d’ong dandrabte, Anin angaja abmibmibdae orde addimaddae”. “Kitungan anabhanae sikoija kun garden a d’ong.

Turturmaran kayating maih”. Kitungan anabhanae sikoija, buteja d’ong adrab-ben. Kitungan aamben ampara dakuten dile ayam (Daniel 12:13). Danukan do tungerderan jajing ayam sikoija hamle adakuten? Jajing ayam sikoija alunlingben kanalkalbenji dakule adakuten? Orde jajing ayam sikoija ambendaman batte kanalkalbenji dakute? Bindo angante amben Kitungan a s’i-lingan a surpitte, Anin gugudage danukaben saite bindo barij kanalkalan saring janang d’ongben tangortaben do tanunjing-lingan janang. Kitungan d’ongben abhanate bangsale.

Engale U’an a Onan a d’ong tangorte akapparda-lingan, orde engale arengen-lingan dakule urungte. Yang a surda sanittan kan ate! Anten asan, uyuble gamban dirnaben batte (Ebri 4:9-10). Tanahimdam Kitungan a onagji, angajanang amben Kitungan asanayam sanaisai, lagaddamnaba do Kitungan a d’ong saiba.

Okiy Kinolbe absele: “Anten asan a bantongben detalen, yante gamle udednang,Anin a lanulu lingan a ganten asan sanibdaijan d’ong-Ien danendakule janang den mang-ben saring buteja a ganten asan,.ardoile gamle gittate pedde” (Ebri 4:1).