Aug 23 – Turtursingan a Sabjabe!

“Anin tetten gaian gaile arenganji szdszdeten. Anin bangsa drakiya lanamanji tette lingan gueten. Kuni a tarangdi lingan aboi diydiy turtursingan sabjale” (Jisaiya 5:2).

Anlen turtursingan do kun ate Kitunglen Jisun na, Anin a d’ong arkaddangan batte anabtaijan dele Kalobori abaruban, iten asan gamlenden Golgotaban anamdaijan dele, Anin ablulen do kuddublen tandiaiten.

Barij a berna-lingan, anlen kinoltabe kan kuddub-lingan. Kitungan Jisun anamdaijan dele arakaddang-lingan, bagu jumbur-maranji batte adamban. Bagu jumburmaranji atarangdin-lingan saring Anin aboi Turtursingaan dele. Kun a turtursingan daku papwr do tabme anosaij-lingan, itente anlen galamtabe kristun apwrba do Kristun atikki’. Anin janang aboi turtursingan do ansale janggardadage Kitungan a pasijanji do Israel maranji d’ongdage.

Anin na turtursingan marid Kitungan amangba tanangte do pintu maran do butente ruangan do ordaran abmainate. Turtursingan na mandran a O’nan order-lingan Kitungan a Onan ruangan a pissirdianji amangba, do butente aboi daraidajan. Do bo surda anabmaina tangoran Israelji do bigarda jatinji batte

Anin anlen abmele pangdamlen atandiben asan. Anin gaman dakuleja, Anin anlen abmele banadgi dele, anlen Anin batte gamang delenten, iten asan gamlenden Anin turtursingan dele awr ganuggun do asuyeman batte. Iten asan Anin turtursingan dele iten asan a d’ong anabdaina dele? Bibolan gamte: “Bar engaIe arzngrzng darakuna _ lingan Mojes j’adan abdzeten, ettegoi na a On Maran anabdznan a deben dete na. Yante gamle Anin amang lingan a derten a mandran er ahidan a mandrengnan hangte” (Jon 3:14-15).

Nami amben pintun lingan dakupo, anangan do banandrab-lingan? Gij-gijba kaloborin arakadangban, itente atanangte turtursingan ambrij. Mihaman atabmadte, jordadan ambrij. Kun saring sattang, Kitungan a suyeman amben sanaisaipo, anabsittan do asanayaman.

Butente amben abmele turtursingan dele, anin Marid Janggardan apailai, turturle arabrabben asan. Anin adimadne orde onijja adyirre do d’ongben sagalte Kitungan atanurturan batte. Kun ambrij ayam, Anin janang tanangte d’ongben agijgijben do asagalben asan, itente agaja adsindde.

Tanahimdam Kitungan a onagji, senba do abguguba Kitungan a d’ongan, butente d’ongben turtursingan tiyle Kristun do Marid Janggardan d’ongben a gijgijben asan.

Okiy Kinolbe absele: “Gija, Butente Israelanji a d’ong dandrabte, Anin angaja abmibmibdae orde addimaddae. GAMANGtungan Dandrab Mar-nam; GAMANGtungan jandrumsengba-nam a lugngun” (Sanenken 121:4-5).