Aug 17 – Bar-Okij Tanunjingan!

“Kun a tiki barokij Balak abmanggod maranji a d’ong appaieten. Aninji abmang abmanggod maranji saring ateng do aninji saring murda maranji dakuleji” (Danisan 22:15).

Bgiarda jati-maranji, bo tumadgijmaran Kitungan sedale, ahiman ‘Balaam’ gamle. Kitungan absittate butente ate angte do butente ate absittate. Balak, bo Moab a Rajan dakule kan ambrij do appaile a rajanji agudingben asan Israelanji a d’ong angben asan (Danisam 22:5-6).

Nami Balak bantonglen iten asan gamlenden aninji ateng mandranji dakule, do Moab asule iten asan gamlenden anin Israel-amandranji asanggemlen ayirlen asan, engale aninji amukanji absosoleji order-lingan. Anin ogandile israelanji a d’ong abarite, bogad Balaam anglenden. Bindo kuni a togal-ling, Kitungan yirai Balaam amangban do gamle, “Kan butenji aman batte?” (Danisam 22:9). Do Kitungan gamle Balaam a d’ong, “Aman aninji ampara yirdong; aman mandranji a d’ong angdong, aninji anabsitta-marji” (Danisam 22:12).

Bar okij Balak a rajanji appaile, apemengle do ateng mandranji batte. Do aninji yiraiji Balaam amangban do gamleji, “abasuyem gamle anlen anabsosoai itente yirtai ate; Rajan abgugutaben awrloge, do lumba itente gamtaben” (Danisam 22:15-17).

Angante Balaam taijtiyan batte anappaih deleji, anin U’alle Kitungan a d’ong bar okij bar okij, do Kitungan abarabdan yiraiten amangbanji. Angajanang sonuman yirtai tanunjingban, anin adkadabne aboinan batte, bindo tunjingtabe awrloge kan ordaran saring itente itente adakun batte.

Angante sonuman tunjingle Jisun a d’ong, baruban urungle do gamle, “Okij amben ampara ampara karran bernan abberai, iten asan gamlenden kan a ordaran a rajan yertai, do mang-ling-Hen anin a janaban iteja agassa” (Jon 14:30).

Angante Jisun Arakaddang-lingan tanangan dele, sonuman mandranji batte amangben Jisun a d’ong baile do gamle, “Bogad aman Kitungan a Onan delamanden, arakadang-lingan saring labsonai. Anin bigardanji ablule Anindaman ablulen adrabtie.”

Tanahimdam Kitungan a onagji, atanakudan atonhina sikoija, d’ongben tanunjingan dete. Bindo “Adlinglen abgarren dakunaba. Asanggem mar ben duaih suman, garum garumle samdakului kidge bute bute anin rapti mole szdte, antate saijle saijle endungbe” (1 Pitor 5:8). Do ruangan d’ongben gijgijte yangam amben daina ahangte tanunjinganji saring. Kun saring iteja arasudan agasa tanunjingan sadan saddle. Ateng asan, Jisun ahim-linmgan, hanaba do dainan hangba dile tanunjingan saring.

Okiy Kinolbe absele: “Ayengan a mandra kanalkal tanungjengan sayete, anin  man’oihdam. Iten asan gamlenden tanungjeng lingan dainan hangan bangle anin ayengan a mandrengnan a raja-ranubboban Gamangtungan Anin a d’ong timyimten a mandranji a d’ong sibdaijeten, antate hangte” (Jakub 1:12).