Aug 15 – Okij Kanan-Lingan!

“Antin asan itente a Galiliya Kana lingan Jisun d’an drakiyadan abme—eten” (Jon 4:46).

Ateng gardanji ganudingan dete Kanan gamle, Kitungan Jisun gadlamlangten Kana agardan abmele itente rumang baran, Galiliya Kana lingan adelen ate’.  Kanina a garda-lingan aparamangta rumangbaran lumle.

Bo sidrungan dakule kun sidrung-lingan Jisun ja dakule, ganudingan ambrij. Anin dane pangle itente ertunla deleji, bo rumangdage d’an saring drakyadan abmeben. Kan a baran batte Jisun ganudingan jale, kun sidrung-lingan maidamlen, rumangbaran lumle kuddub asanaisajanji tiyle kun birindan a d’ong. Kan batte, amben janang mandrengna-ling-ben rumangbaran alumben asan Kitungan a d’ong gudingba, itente sanaijanji dakute mangbaben.

Ateng gorjanganji dakule yaryarmanengba oante Jisun anadruad, ‘Galiliya Kana’, bagu tardin anabsittan. Barokij kun gardaban yireten, barokij rumangbaran alumben. Koti-lingan bo mandra dakule a pasijan bimbim-lingan Kaparnaun garda-lingan. Bibolan gamte, “Jisun Juda saring Galiliban yeraiten, gamle anin amdangan amdangle, On-hen absamangben asan Iatsole yerai, gamle Jisun amangban iyaiten garberre. Iten asan gamlenden kahidge dele” (Jon 4:47). “Jisun anin a d’ong gameten, Ma yera, on-nam nami m’engte. Bar anin a d’ong ibente a bernan Jisun opungeben, antate anta mandra deran derren yereten” (Jon 4:50). Do kun ayam-lingan, a onan samangle.

‘Galiliya Kana’ janang bo darakuna. Kunagardan saring Nataniel aboi Jisun ahanana maran dakule. Ahiman ‘Nataniel’ agaramgaman ‘Kitungan a taniytiyan’. Kanina pedde ate, Nataniel sandungle Jisun a d’ong, Kan lingan a rumangbaran gijlen atikki. Jon kamb’ol-lingan, ahiman anidolan dele ‘Nataniel gamle’ do bo bigarda-lingan, Bartolomi gamle anidolan dele’.

Kitungan Jisun birindalinglen ja rumang baran lumte. Anualberan kan ate: anlen gudoingtaben po garbernalingan, birindalinglen rumangbaran alumben asan, engale Mari lumle? Orde anlen gudingtaben po d’onglen absamangben asan engale kun mandran lumle?

Tanahimdam Kitungan a onagji, Kitungan Jisun j’eling-ben yirtai do iytai dakune. Kan a gardan saring amben jznjzn murdadaman a mandranji. Mangben saring ateng Kitungan a boantanji janang yirtaiji! Kitungan d’ongben absittate do asuyeman a janggardan a ranaptin tiytaben.

Okiy Kinolbe absele: “Pilip Nayam’el a dong rabangle gameten, Ayengan a Mandran abmele Mojes banaih kambol lingan do tungmadgij maranji idolleji. Anin a d’ong anlen a rabanglai. Anin na Jisun, Najarita Josep a on” (Jon 1:5).