Aug 11 – Adnahide!

“Bindo Hen aman apsele garberai, yante gamle derna-nam adnahide. Do aman abyarj’elen a tiki, banuhang-namji a d’ong abradua” (Luk 22:32).

Nami a dinnaji ayamling,  dirnaben ajardinna tanunjingan dete. Sonuman anordin garle d’ongben tungjingte. Bindo Kitungan gamle Anin amben abmele garberte, dirnaben sid-dongete.

Sonuman anitsume. Bindo anin d’ongben obsadte, butente ajanumjum ambrij. Engale Kristun mandrengnaben Anin batte dakuben dete, amben aboi bo bangsa janumjuman, do Kitungan aganijgij-lingan amben aboi bo jznjzndage.

Angante jumbur-maran jumburten, erhandrangdage asamana sanaisaited, bindo anin boi boi janatidage asamana jumburten rana, ruppan tanortolan. Kun ambrij, Sonuman bo bangsa januman saite do absidte.

Amben aboi janattidage. Anablun ahangle a mandranji, janababan do erhidan amandrengna Kitungan janatidage tiybenten. Engale kznollabe, dirnaben boi boi murdam. Angante Sonuman tungjingtaben, anin dirnaben jumburten. Kun ambrij ayam-ling, abdusataben dirnaben batte. Do kun ate dirnabenna, Kitunglen Jisun Kristun. Anin d’ongben ablule dongdrabte atanakudban sikoija. Anin gijmaddage dirnaben aganijgijan saring.

Sonuman Anappai Pol amang-ling janang kanalkalan do tanungjingan panglai.  Anin dilaijle, ganoroijan, mandradaman, kanalkalan, erasuyeman, danukkan do anabkalkalan hangle. Kun kuduban hangle, atanakud-lingan Poldainan hangle, do gamle: “Hen hanglai bo bangsa sanun, Hen abrihna renglai, Hen dirna-lingan dakulih”.

Dirnaben abjunba, itideleja bogad-den kanalkalan do tanungjingan mangbaben. Kan jznjzn murdadaman aberna amben Kitungan a berna-ling a dakunaben dete, dirna-lingan  a marangben asan. Yangam bo mandran dirna hangte? Bibolan gamte: “Anten asan anamdahgan’ saring dernan dungte, Ido Kristun a bernan batte anamdangan dete” (Romi 10:17). Tanahimdam Kitungan a onagji, sonuman d’ongben kurtepo, tanungjingan do kanurkuran mandrengna-ling-ben, orde janoldan batte? Kitungan a bernan hamba. Do angante amben agamte bibol-beran, dirnaben atengte.

Okiy Kinolbe absele: “Anten asan anlen janang dijte surda tarubge sakki maranji batte yanaryaran a delaian asan, jaba; dile lanaginan do mang ling len apanbolong pintun umdrengan umdrengle dernan abmanggod do tabkud Mar Jisun amangban sengsengle anuywb sanayen batte mukkaba-len a garatassige yzrnagod lingan a yzrnaba” (Ebri 12:1).