Aug 03 – DEVER SANNIDHIMA ARAAM CHA

Vimochangrandh 33:14 Mar sannidhi thar sath avacha, Ma thona araam duchu.

Juno Karareman Navvo Kararema sada Dever sannidhima chajako araamer bagey bachanevo chajen dekacha.  Yee Dever sannidhir bachan sey ashisemathin jada vencha. Yee araam payer vatevuna avasaravuna malam karla.

Dever sannidhij yee Dev dajako araamen payer agediyar vat. Dever sannidhima thu bhesastho tharo jaanema khushinan vu Dever premethi bakdibharlacha. Ajji thu anandethi Deven geede bolan stuthi karastho vu Dever sannidhi thar sath avacha. Thu kanna athmathi sathethi aradhana karechiko Jana vu Dever madhuravagi chajako preeethi tharemathi porlan  javacha.

Vu Prabhu tharo gollavariya ven shanthir pani Kan lejavacha. Shanthir pani katho vu Prabhu dajako araam. Gorli athoi dhudesarik panin piyeni. Jethi thona araam desaru vu Prabhu thar aangaj jathanu.

Sojavon, seraphim, seruphimeval sada yee Araamen desaru Prabhuthi bhalan aarecha. Vujji vaajaler sthambhan angarer sthambhar nai vu Prabhur  moto mahima thar mundag melacha. Rajero Raj prabhuro Prabhuj thar mundag jaan thona araam dacha.

Dever sannidhi thar mundag javukaratho kunsi Pharoreda thona thamadeni. Ajji Laal samudar thu langal javaju vaten dakalacha. Yordhaner khalya sada vu porlanaju hoto vor vatema dagarjavacha. Sey Yerikor godavo haal vejavacha. Sey thara pithaler darvajavo that thutjavachan, sey thara loyer kaddivo thunakal thunakal vejavacha.

Atho thu Dever prasannathan kukan valakechi? Geder grandh 22:3 Yisraelevaler stuthirpar betojako Dev thu Pavithar katho thu sada vu Deven stuthi karastho thar vacha vu Prabhur sannidhi thu chijako jqgema avachakan valaknu.

Paulan Silan dekatho, vunder taangena loyer saanklithi bhandan hacho marmelethoi vo Deven geed bolan sthuti kide, vo geedevun samalan vu jailema chajako khaidivo seji khushi karrethe. Hannu votha chajako seji vunder dallema khushina palen jaanema araam palde Kan dekacha.

Ajji jada dyan karen pado Hebrivalun 4:9  Jethi Dever jannena araamer dad abbepar Ayer cha.