Apr 26 – KEN THU ARADHANA KARECHI ?

Daniel 6:7 Kunsi Deven reda manikyan reda vinathi karatho vunden sinkoser kuvvema ghalajavacha kan Raj yek shasan lakkan dinocha.

Manna vuncho padanu ann manna sey hacho kenu kajako jagema aaj banchrecha. Ajjekethi hanu vuncho padalevasu pisana vagathena kharcha karacha.

Rajakeeya kareval vunder laar ann mundag jayeval vunden jay jay kethanu barkavnu ann phuler haar ghalalenu kelach. Vo kannai kai asa karachkatho moto janner gumpu vunder mundag dhasanu kan yee kam karevalen jada pisa kharch karan palu karacha.

Yeej thara aajkal rajakeeya nayakeval vaddan arejen dekrecha. Vunder peetaper bhesan thamaldevas gauravan ann pujakarevaler nai renu kan dekalrecha. Assa nayakevu mundag labbari karthey vunder pagekan godi valukaracha.

Mar premer Dever beptavo tham hallvejavajako yee hevan seeklomath. Hanu karastho vunden malam vacha Dever Rajyamen yee heva kathra jada mando kam kan. Hosea 4:7 vachan sada yee hevan virodvagi kacha. Kunvatho manikyar mahiman korlachko vunden mahiman Ma mando mahimar nai badalnakuchu.

Abba kathon apan ken aradhana karnu? Ann kun aradhanan payevalo cha? . Danieler Dadema seji chakravarthir mundag godi valnu kajako shasan vethi, athoi Daniel von khathar kidokoni. Daniel 6:10 vachaner prakar assa shasan Rajer hather vintithi hakkam demelech kan malam rethaper  Daniel vor vuncher gharema jathanu

Yerushalemesam jannal vagadan daden theenhaptha araj karaju vu dadbi araj kido kan dekacha. Hanuj thu sada Yeklo Dev chajako Yesu Prabhun mathramaj aradhana karan stuthi karnu kan dallema ghat karla.