Apr 20 – Asangem-maranji Sanensenan a tiyben abmele!

“Pintu baran abukkaten a mandra duaih suman saring karudkudan dele. Iten asan gamlenden aparamangtan saring duaih suman pintun lumeten. Kan asan Kitungan a On panunggen dele, yante gamle Anin duaih suman a baran rapti abs’zdte” (1 Jon 3:8).

Sonuman boi boi surda asangem-marlen Kitungan asanensen lamun-lingan, iten asan gamlenden sonuman dakulen adrabtie Kitungan a d’ong sanesenan adete adarakunaba. Kitungan, oga-janang sanensenadelenden Anin yirtai kun amanengba, oante a d’ongan sanensenan dete. anten asan, sonuman bo bigarda darakunan saile dunglen yirte. Ateng asan, Kitungan a d’ong senle abgugule a dakunaben lumleji do sonuman hamle adrabtiedji.

Arobjong-beran, ogandile gijba bo surda maran s’ingbaben yirtai do kayatin barren iytai dakune itente d’ongben adnidsumme. Naami, amben a d’ong gamle adrabtie dunglen yira gamle. Bindo iten amben alumben dete, bo bigarda ompun a d’ong amben abguguben dete. kun ambrij a ompun agasa. Bogad amben bo bigarda ompun a d’ong senle a dakulenanden, atabdong anin dunglen yirte s’iben saaring, do abyernai janang.

Kun ambrij anlen janang alumben dete sonuman agonben abmele. Bo ayam sonuman janang ruang-lingan sanensen baran lumle, do butente ruangdage asanensenan lumte. Bindo kinsanan batte galule, anin Kitungan sattang asangem-mar adead bindo sanensenan asangem-mar-janang dele, sanensenan do abpemengan Kitungan a d’ong. Kitungan a d’ong asentaben batte sonuman dunglenyirte.

Bo surda Kitungan a boantan, ahiman Richard Umbrandt, a d’ongan ateng mihnum saring korojosing-lingan anabkalkalan dele, bo dinna anin engale susule: “Angante anlen er korojosinge er delaben ateng miynum sikoija daku, anlen agaja disamle adakunabe, dinna orde tarikon. Dile dinna, anabkalkalan a d’ongan, ateng anabkalkalanji batte, kani kuni batte. Korojsingan a dane mar ganagalingan kani kuni maile tiyetenji Kitungan a d’ong abgugulenji asan. Anlen aboi range-lingan aendungtaben ambrij delengten. Bindo bo dinna pali-lingan, anlen kuddublen man’oihan batte barij delangten. J’e-len m’oihte do anlen Kitungan a d’ong abguguben abmele oskaitenben. Do anlendaman galamtabe, adiaran a dinna. Dile Kristun maranji kun a dinna-lingan abgugule dakutenji, kun a dinna-lingan ateng asuyeman hangtabe. Do kun a dinna-lingan, asangem-maran aranaptin s’idte”.

Tanahimdam Kitungan a onagji, engale amben abgugule a dakuten, kun batte amben sonuman a d’ong agonte, j’ingben a jaitan, ambendaman agalame. Angante Kitungan a d’ong abgugute, Kitungan jingben ajaitan pangtai sonuman a d’ong.

Okiy Kinolbe absele: “Aman bera mar-Namji do danagdang mar-Namji a t’odan abrzngnaben asan resasijanji do memenasijanji a t’odan saring sanensenan gabrile” (Sanenken 8:2).