Sep 10 – Dakunaben abmele Ganuddingan!

“E buhanganji, itente lingan dile mandran ganudingan dele, tetten anin Kitungan ampara dakunete” (1 Korintianji 7:24).

Pagardaban bo bangsadam do man’oihdage amadan. Aninji lagadam jontunji mandranji ampara mailen dakutenji gardige. Kun Pargardaban do anlen sarigoina daku, Engale pargardaban duai-maranji.

Ampara hanaman dele, yaryar-manengbalen ja duai-maranji dakuji. Bibolan gamte Daudo argaberan abmele: “Duaih lanad mar-henji saring do hen a yaryar kabhid bera mar-henji saring, abaimadan ambrij Aman d’ong-hen dakku-ih.

Reneng-Namji a lugngu lingan d’ong-hen absoso-ih, Bibol-linga pargardaban abmele anidolan dele. Aninji ja Janggardage asanosoban dakuji. Pargardaban abmele Bibolan tambegarda gadlamte engale aliban, pargardaban, tulab-medan, baruban akumedan, baruban amurkundardangan kan ambrij. Israel a mandranji a d’ong manaridban do er marid janabbanji abmele, Pargardaban aboi marid jontun do a jelun jumle raptiteji. Bibol-lingan, amben arabangte Kitungan aobjongten ateng jontunji do nebanji janggardadage abaran. Lua-neban arobjongan dele Janggardadage a mandrengna, drakyadan batte birindanji a d’ong gadlamle, do Oliban neban aboi Janggardadage amandrengna Israelanji.

Kun ambrij, anloen janang gijtabe Raja-ontidanji abmele U’a Kitungan, Murkundardangan Kitungan Jisun batte, a On Kitungan, do Kukkuran Marid Janggardan batte. Solomon a Kanenan objongle pargardaban aboi ‘Tanimyiman a d’ong’. “E tanimyim mar-hen, umeng yerai; sanarwm baru lingan dakun a pargardaban ambrij orde a on-leban ambrij aman dea”. “Tagaldan sayu-rzngan adnzden do lanungudan er ganittan de-en sikkoi ja e tanimyim mar-hen, bo pargardaban ambrij orde baru linganji danggarga-leban ambrij aman daiyarai.

Nami Kitungan mukababen Pargardaban tadnangle do amangan saring, Anin ateng Janggardadage a bernan hangtaben. Aparamangtan-lingan, pargardaban atal-jingan, lanankkaban tanangtaben. Daudo gamle: “Anin j’eng-henji pargardaban ambrij arijdam abmete (1 Korintianji 12:29,28).

Do Anin d’ong-hen barunji a langka tabnangtih, Aparamangtan amben, ahangnaben dete Kitungan atimangban atanangben. Anab-bagu-lingan, Kitungan amangban butente butente hatenji, aninji ampara dakuten. Anlen kinoltabe Abakkuk lingan, “GAMANG Kitungan ranapti-hen. Anin j’eng-hen bo pargardaban a j’engan ambrij abmete, do langka darakuna linganji d’ong-hen erabmuij abhanate. Kuni murda kanenken maran apsele; anin tige-raij-henji handramete”. Kitungan d’onglen hangte a tanangben asan do a baranaben Anin batte.

Okiy Kinolbe absele: “Bzgarda bzgarda janab asuyem— taniyanji daku, bindo Jangardan maih aboi. Bzgarda bzgarda. janab ganang- kilanji daku, bindo Gamangtungan maih aboi., Bar bzgarda bzgarda janab ranapti baranji daku, , bindo goayengan a Kitungan kuddub lingan abojoraite, Anin maih aboi.” (1 Korintian 12:4-6).