Sep 09 – YESUNA BALAYERO

Yohan 2:2 Yesunan vor chelana vu vaayama balamale.

Yesuna vu vaayama balamale. Athra jada Canaama vethijako katmalo Yesuna aadar dethanu gouravathi balaye jethij Yesu Prabhu agediyar acham kalar kamen kidoju dekacha.

Thu kanna vatho aadar dethanu Yesuna gouravathi balalechiko janna vu Prabhu thar sath revalo cha. Vu kunas jaag reda ajji kunas vaatema reda vu Prabhu thar vasuj aayeval cha. Vu Prabhur nam kathavatho aradhana karan mahima karachko votha revalo cha.

Vu Prabhur sannidhima renu kelastho thu thodsek kam karnu lagacha. Agediya thu thar katmalo seji bhalan yekkaj mannethi Prabhur pagema bheser seeknu. Jethij Mathai 18:20 vachanema Katha yek dee theen golavethanu manna herde lalachko votha ruchu Kan Prabhu Yesu bachan demelocha.

Jada manikyavun Yee Dev Ma anand padan khushithi rujana reni. Vu santhosham Mar jorethi aayijako cha, lapnan Khali kanna ma velabhavetima ruchu ko jannaj ajji ma padjavujana, appuma, andharer vatema ,maata mathrathi gherajavu Jana, ajji varu renijannaj vu Dev Mar sath racha Kan kelu karacha.

Yek chorir sambhanda deken javajana vu Dever khathar chaka chenika Kan sos kareniju pissana aasthi paasthi ajji sono rupo kai chakai kan mathramaj dekukaracha. Akharima vunden avajako massaj velan dekan vunden voj marlu karacha.

Yetha Canaanema chalijako vaayana dekatho Yesunan vor chelana sada vo balamale Kan vanchacha.  Chelavuran vaaya valer yekkaj sambhandha chakan koni lapan vo Prabhur Dai vethejako chelavon vo Prabhur sath  Kam karevaler nai ra jethij balaye, katho Prabhuj apaner sath revatho vu kathra moto ashis kunika.

Geeder grandh 133:1 vachanema yidek bhayu bhalan rer,  kathraiko achon, kathraiko anand cha Kan Dever vath kerocha.

Apan Christhur ghareval Kan kannai bhuljavnu koni. Vu Christhuj apaner sejiri mathesariko cha. Viswasi reda seva kareval reda apan seji vu Christhur jeevadama bhaga ven cha.

Christhuj mular mathesriko bhata. Vu bhata chajako Christhu paraj apan rajer kotar nai bhandarecha. Mar Premevalavo thu yeklo rethanu kai karer butha veni jethi thu Yesunan vor chelana balala.

Ajji jada dhyan karen pado  2 Dinvruthanther grandh 15:2 Asa, Yehudulevalavo, Benjaminevalavo, tham seji Mar vath mano,tham Yehovar saam revotho vu thamar saam racha, tham vor vacha vicharan karotho vu Dev thamena dikavacha,  vona tham cheti karlotho vu Dev sada thamathi chetij rejavacha.