Aug 12 – Er-sanulabe Lulunaba!

“Kan ambrij Jiyasapat a rajaman erztnage dele. Iten asan gamlenden anin a Kitungan anin a yaryar maneng anin a d’ong lulunan tiyeten” (2 Birinda 6:12).

Angante amben Kitunglen amandrengna agijte, amandrengna garberan do U’a Kitungan batte adaku amaina tanurdun dile ayam engale daku kun ambrij anlen janang mandrenlen adeben dete. Dile mandranji garberan do Kitungan batte amaina tanurdun adakuben dete. Angante amben agijte Enok amandrengna abmele, anin Kitungan batte halen, gardin ambarij.

Bakurdi dinna sikoija Mojes sinoi baruban yirre do Kitungan abmele royongan tiyle. Tumadgijmar Eliya tangsoi garberneten. Kitunglen Jisu Kristun. Bakurdi doinna sikoija U’an amangban, arznrzn darakunaba yirre do garberneten. Nami South Korea lingan garberan batte bo surda anablun dele nami a dinna-linganji. Bo surda sobanji, angante Kitungan a boantanji ualteji jajing amandranji bakurdi dinna sikoija anamling do garberling dakuji, bokurdi ajar amandranji tirredsilingji. Ajardina, anamna garberan batte bo surda baranji dete janggardadage South korea-lingan. Dile sarebasingan ganutulan dele baruban alanangkaban. Kan aboi arabmadan ambrij.

Didargam garberan ambrij dile tamba togal, barij j’en batte surpidle. Amben bogad-den bakurdi dinna orde bokurdi-aboi dinna sikoija anamling garberlen adrabtie. Bindo dile royongan tiyba do agarbernaben abmele ayam tiyben dete Kitungan amangban. Boi boi kalkaldam kan ate amben onlla mar-lingan agarbernaben.

Aten asan, bo bangsa darakuna sedaba. Addiaran sadansadle, di-dargam garberan batte dile sareba-singanji ganutulan dete. Kan batte ganalaman dete di-dargam garberben batte. Amben di-dargam garberan abmele royongan dakuba. Tamban orde togalan tangsoi a garbernaben abmele.

Bangsadam, bigarda royongan ayam engale amben bangsale garberlen adrabtie. Garberan endrang asusuen abmang idolben dete iten iten agarberben dete. Bibolan do kznkzn kambolan ahamben dete. Kitungan amangban kznkznan kznba, Bibolan kznolba, sanenesenan tiyle garberan susuba. Tanahimdam Kitungan a onagji.

Akaridadong tangsoi gaberan janggardadage amandrengna agutulben asan. Anten asan anamdahgan’ saring dernan dungte, Ido Kristun a bernan batte anamdangan dete.

Okiy Kinolbe absele: “Iten asan gamlenden amben man’oihan batte dunglen a yerte, bar amben sanabyun batte anabanjengan a dete; bar surda do sanna barunji temang-ben man’oih kanenan kenteji, bar basseng lingan dakun a kuddub nebanji tarjubsitenji” (Jisaiya 55:12).