Aug 04 –Labaddin batte Lulunaba!

“Raong-Hen galdamnaba, bar mang-ling-Hen hanghangnaba, iten asan gamlenden Hen uggar lingan labaddin do lagaddam daku. Bar pwrarda-benji apsele amben lulunan a hangte” (Mattiu 11:29).

Kitungan a itsuman dakule a nokke mukka ambrij mandran a d’ong agabdelleben. Kitungan Janggardan. Kan ate a Janggardanna mandran do inslon amangba tiyle, kun batte anlen m’oihlen raptitabe amangban janggarda-lingan.

Ogandelle gijba! Er-galamben batte, j’eben Kitungan batte abasuben saite. Jontunji do ontidanji batte atanurdunlingan amben adakune.

Kan mandran sttang bo bigardagge ganabdelan dele, angante bigandanji batte objongtabe. Bindo amben, ayengan a Kitungan a nokke mukkan batte ganabdellan dele.

Kandudan dakuten kandudan batte. Kumlan dakuten kumlan batte, barij Kitungan a Janggardan batte, Kitungan atimangban abasuben detena. Gijba yangam Daudo saile a tanardu-lingan adakunaben asan, gamle: “E Kitung, pargardaban karran argalan asan alod’an saijten ambrij, Aman abmele pwrarda-hen karran argaldate.  Kitungan, Am’eng Kitungan apsele, pwrarda-hen Oscargaldate; angan hen yerre Kitungan amangban ardutai.

Amben Kitungan atanurdu-lingan dakulen araptie d’ongdage amanagadan batte. Bindo amben tanurdun-lingan dakule araptite janggarda-lingan (Danissam 12:3). Angante agarberten, Kitungan a janggardan maiten janggarda-ling-ben, do ganabdelle-marben batte amben janggardadage dakulen araptite.

Kitungle Jisun gamle: “Kitungan Janggardan, bar bute bute Anin a d’ong senpwrteji, aninji Janggardan do janardin batte a senpwrben dete na. Angante pintun ganle kun ayam saring janggardadage.

Amainan abyzllneten do mandran a j’en asudale. Bindo Kitungan barokij abmainaeten. Pintunlen asan Anindaman tiydamlen do marid Janggardan appailai mangbalen. Kan ate marid janggardan abasuben asan, amben m’oihlen arabteten ambrij Kitungan batte halen. Tanahimdam Kitungan a onagji, dirna batte gamle senba Kitungan a d’ong (Jisaiya 53:7). Kitunglen Janggardan. A Janggardan mangbalen dakule, am’oihnaben asan. Aten asan, anlen Kitungan atanurdu-lingan abasuben abmele’.

Okiy Kinolbe absele: “Laddamna sanave ben kuddub mandranji a d’ong ganalaman de ete. Gamangtungan tuyadam” (Pillipi 4:5).