Mar 29 – AKHA KORIBI JIT KE!

Proverbs 21:31 “ghora tayar kori kene ase din karone judho laga, hoilebi uddhar ase Isor laga hi”.

Raja jun jiti bole mon hoi, koribo pura lagi thaka laga tayari khan. Tai pora tagot koribo sipahi khan ke, sikhabo sipahi khan ke tayar hobole judho nimite; dibo notun lorai kora laga tarika khan; aru hajiri koribo samarthan ke aru bhal icha khan dusra raja khan laga alag jaga pora. Jitya tai khan tayar hoi jai judho nimite, tai khan nakapibo nahoilebi bhoi nakoribo din te judho laga.

Aji laga ahem podh din laga: “ghora tayar kori kene ase din karone judho laga, hoilebi uddhar ase Isor laga hi”, itu kotha ke koi salha diya homoi te chatri khan ke jun khan tayar kore porikha dibole. Jun khan pora kitab bhal pora porishe, bhoi koribo nalage tai khan laga porikha nimite. Tai khan nirbhar kore Isor ke aru samna kore porikha ke atma biswas pora. Hoilebi chatri khan jun khan phelaishe tai khan laga porha homoi ke khelibole, film sabole aru aru homoi phelai diya sathi khan logote, akha koribo napare bhal koribole tai khan laga porikha te. Haar to pabole ase manu karone jun khan tayar nakore.

Ekta biswasi hua te Krista te, ami khan sob ase din judho laga; utu din ase Aha laga Isor Jisu Krista. Utu din ase jitya Krista pora bhangabo shakti ke sob mora khan laga; aru din ase mahima laga. Utu iki din te, antichrist bi ghushibo prithibi te. Judi apuni tayar hoi ken ease, apuni bhhoi nakoribo lage utu din karone Isor laga nahoilebi din apuni mora laga. Awaz te pepa bajna laga, apuni bodli hoi jabo, aru uthai lobo apuni ke swarg te Isor logote.

Isor pora shikhaishe amikhan ke ki amikhan dorkar ase tayar hobole, utu uddharan pora gyani kanya khan pora. “adha rati te ekta kandi thaka awaz hunishe: “thakibi, dulha tu ahi ase; jabi aru taike lok koribi!” aru jitya budhu kanya khan jaishe kinibole tel ke, dulha tu ahi jaishe,a ru jun khan tayar thakishe jaishe bithor te tai logote sadi te, aru darwaja bondh hoi jaishe” (matthew 25:6,10).

Kiman bi biya hobo itu ami khan ke chari kene ja tu din te Isor laga? Apuni khan paar koribo lagibo biya atyachar ke antichrist khan laga! Bordasht koribole napara laga hobo utu dukh khan! Tate tan pora mani thaka niom hobo antichrist laga; aru tate dhali diya hobo Isor laga gussa ke, prithibi te. Dangor atyachar thakibo utu din khan te, jinika kun bi dikhanai jitya pora itu prithibi ke bonaishe.

Itu din khan khemai laga di ken ease apuni ke kilekoile achurit morom aru daya pora Isor laga apuni karone. Pobitro Atma, kotha Isor laga aru maujudgi Isor laga di ken ase apuni ke, tayar koribole apuni ke din te Isor laga. Pondit khan Isor laga bi ase apuni ke tayar korai dibole utu mahimajanak Din nimite Isor laga. Isor laga bacha khan, dhuri kene thakibi apuni laga prathana te aru dava koribi apuni laga jit ke.

Aji dhyan koribole laga pobitro kotha tu hoile Luke 17:34 “ami koi ase apuni ke, utu rati te tate duita manu thakibo ekta bisna te:ekjon ke loi jabo aru dusra thakijabo”.