Jan 14 – Tabme Man’oihan!

“Dajingte dinnan Aman d’ong-len kanalkalan tiylalen, do dajingte minhum anlen er banangsan a gijlai, dijte ayaman man’oihan tiylen” (Sanenken 90:15).

Gamangtungan Jisun yiraiten ordarban, bo maneng ganungan. Do angante Anin bungsangba yiraiten, abumung Anin rabangeten er marid janggardan batte adakulen amandran, butente turmurduba basule adakuneten amandran.

Buteja a d’ongan tolbadle adraptiadji, sikkardin batte janang, iten asan gamlenden Anin kuddub tadtadle sidle tanolbadanji. Sikkardin batte tolbaleji janang tadtadle sidle; buteja a d’ong tolbadle adraptiadji. Do togal tamba anin baru-lingan dakule do turmurduban janang (Bagujuanaber 8:16).

Edalen anindam kurdamlen arengan batte dakule. Jisun uale a d’ongan, gamle, “Ahim-nam iten? Anin gameten, Kunuduai, iten asan gamlenden anin amang lingan ateng aggarda kulman ganleji. (Jisaiya 65:22).

Rominji a sanumarji, gamlenden ‘Legion’ yakurdi ajar sanumaranji do gardi-kuranji batte hanandraman dete. Rominji janang kan ate handramteji. Aten asan galamle raptitabe bangsale, koti-lingan ajar-ajar kulmanji dakule. Angante Gamangtungan amangan saring amdungetenji, aninji kambunanji amangban iyle ganaji do baruban dayerleji – aninji bagu ajar dakuleji.

Aten saring kambunanji ganunban abrijlingji, do ganunlingan pangdaleji. Kun ayam lingan, kun mandran amandrengna bo surda banandan hangle, ayengan amandran hamkulle dakule. Butente aputan dakule anin nami jzjzneten?!

Anin kikkamar dakule, nami anin bangsamar dele. Kun sattang ted, bindo Kitungle a d’ongan bangsa anoblingmar abmele (1 Birinda 29:28).

Bibolan gadlamlangten anin yirle do hanangan tiyle itente Jisun amanglingan lumle; do kuddub galamleji (1 Pitor 1:6, 5:10). Angante Kitungan ablute bo mandran, anin ajardina barij gamle anablun hangte. Do kun mandran tabme garadilan dete.

Ogandile gijba yangan a baran kan ambrij, bogad anin Jisun batte abmaineteden! Kun kulmanji bagu ajar ate itente kambun-lingan ganleji do yirleji ganunlingan, anin a d’ongan janang kun ganun-lingan iyte-badih galue.

Tanahimdam Kitungan a onagji, Anin badih togi sing-lingan galute badih. Angante Kitungan maineten, amandrengan bandaneten bo handramdage amandran ambrij. Amben angante banandan ahangte tabme garadil-lingan.

Okiy Kinolbe absele: “E Gamang Kitung-len, lanangga-Nam lanangka-len dakunete; Aman s’i-len a lanuman erztnage abmea” (Sanenken 90:17).