Sep 08 – Paruan a Kubben!

“Gamangtungan a temangban Anin a d’ong a surpidben asan Jirusalem gardaban urungleji Bar janang Gamangtungan a nosaijan a tam bernan ambrij bagu kukkuran orde bagu a onparuan, bo kanuban a kubben asan yerreji” (Luk 2:22-24).

Onparuan janang aboi bangsa ontidan do iteja anogalan agasa,kanuban akubben abmele a d’onganji sanaisaidam. Kammedan do jontunji akubben asan ayengan a anabanji sanaidam. Bindo butente butente ate kammedan do jontunji, adkubadji aninji paruan batte kanuban kubleji (Lebi 12:8). Anosaijan ambrij Kitungan, Joseph do Mari panglaiji paruan bo kanuban ambrij Jisu abmele anab tamji dinna a karukudan saring.

Kan ambrij kukkuran ja bbutente buten ate, aninji adnisumeji kamedan do jontunji aganijgij-linganji, do aninji er-t’ul ontidanji, asui lebun batte taniman dete. Aninji endungle dakutenji. Bindo atenganji anogandi, aninji man’oihan batte a j’e-linganji. Aninji Kitungan ambele kanuban kubteji a mangbanji Labsotai gamle do amihaman batte ganijdan dete.

Ajardinna, Kitunglen Jisun Anindaman ordarban yiraiten do kubdamlen, dile mandranji abmele – banaggi do gamang maranji abmele, tanodagge ted,kuddub mandranji abmele. Dile mandranji abmele, bindo kan bo bangsa anogalan dakule, kanambrij. Along-maran radu dakuben dete barij baran alumben abmele. Do kan ate sanaisaidam Marid Janggardan abasuben asan, ranadun do anabumengan atiyben abmele.

Bibolan gamte: “ayengan a Kristun er ahidan a Janggardan batte Kitungan amangban er adildage kubdamneten, Anin a mihaman adlingi’eben a kahid baran saring yan awrdam rapti abmaridte, yante gamle amben am’eng Kitungan a d’ong rapti a gangkilte!” (Ebri 9:14). Marid Janggardan sayamle Jisun Kristun a d’ong pintu kanuban abmele Anindaman. Kan ambrij Marid Janggardan sayamle asayiben asan arakadangan tambedle apangben asan, danusa do kudduban arasudanji sayile yireten.

Tanahimdam Kitungan a onagji, amben bogad-den tanunjing-lingan ayirte, abdusalingan do ganarojan mandrengna-ling-ben. Sanayaman abmele rungan a kukkuran amangban garba – Marid Janggardan kuddub-lingan sayamtaben. Marid Janggradan sayamtaben kuddub kanalkal-lingan. Kan a ranaptin batte amben dainan ahangte.

Okiy Kinolbe absele: “Ettele anidan daku, manan. ‘Aman asan anlen a barij dinna kanabhidan a detai, kanabhid-tungna murkundardaru’i ambrij anlen danisaman a delai” (Romi 8:36).