Sep 03 – Kukkuran a Derna!

“bindo kukkurboi-hen do tangjab boi-hen satta daku” (Solomon a Kanen 6:9).

Anelen gudingtabe Kitungan a Janggardan, Marid Janggardan gamle, Manaridan-na a Manaridan. Angante a Mangan tambigarda a baran daku, a Manaridan-na barij abaran j’e-len abm’oihben asan.

Angante barijloge a ogandite Bibolan a kinollan, dile bernanji gadlamte Marid Janggardan beran, Manaridan abmele. Do kan kudduban arabmadanji, kukkuran a d’ong gadlamte bangsale janggarda-lingan a manaridan do tiyj’e-nalen abumengte. Kukkuran dakuten mardir kuddub ontidanji saring do iteja erogandilebe. Kun asan sidrung-maran gudingte a sidrungbojan a d’ong kukkuran gamle do hadab gamle, a murda ber-lingan. Dile sidrung-maranji a sidrungbojan saring saiteji mardir gamle do bo bangsa-boi gamle. Kan ambrij banangsan do manaridan pangtai, engale Marid Janggardan basute manglingben.

Kukkuran marid ontidan kanuban ambrij. Anin adnarune dulai-lingandam, engale bo bigarda ontidanji. Orde jelundam adjumme, engale ardanganji. Marid januman sattang jumte, engale ganagan. Kun ambrij, Marid Janggardan janang ermaridan ajanaban angaja adsaije. Angaja ermarid darakunaa-lingan adakune.

1904 ayam-lingan, angante Wale desa-lingan bo surda soban danakun dele, dile mandranji do inslonji Marid Janggardan batte barij deleji. Angante ruangan saring kukkuran yiraiten, a mangbanji, aninji edalenji manaridan abmele. Kan ate Maarid Janggardan asan, a panuangan batte, a pintuni pingbaleji do barij a ermaridanji ja, kun ayam-lingan.

Dile pintunbenji sagaite, angante  amben ahimten Marid Janggardan mang-ling-ben ayirtaih abmele. Adambaben ardutaih ambrij Manaridan ahangben asan.

Bo bigarda ontidanji saring Kukkuran ate bo ansadam. Angante bo bigardan ontidan koraten, kukkuran itja. Bo bigarda ontidanji gadlamte anasangemman. Bindo angante Marid Janggardan yirtai mang-ling-ben, barij danusaben saggaite do bandabenten do Kitungdage atanurdu-lingan dakutaben.

Tanahimdam Kitungan a onagji, Marid Janggardan lagaddam, do itjaja erogandileben. Anin d’ong-ling-ben bo bangsa maran abmeben asan dakuten do absittataben.

Okiy Kinolbe absele: “Iten asan gamlenen tanimyimnam asan anlen a karran man’oihan do anumengan daku, gamlenden e buhang, badloyim maranji a j’en aman batte sanabyun deleji” (Pilemon 1:7).