Aug 27 – Asuyeman a Karidadong!

“Bute bute sonum kundaijan senpwrteji, aninji asuyem-Nam umdrengteji” (Jonas 2:8).

Kitungan a surda suyeman dakule Jonan amang-ling. Bindo angante anin er-manenemar dele Kitungan a berna lingan, do Kitungan atanurdun saring torsis yireten, Kitungan asuyeman abyarling asui ayam abmele. Do bo surda ukaidan yirai ganun-lingan, bungsangan aldungben adeben dele. Aninji Jonan a d’ong sidleji ganung-lingan.

Jonan a d’ong amoben asan bo surda ayon gabdile Kitungan. Do angante Jonan tiyj’eneten ayon akampun-ling, anin galamle janardinna, butente butente karidateji Anin a surda suyeman (Jonas 2:8). Gijba er-handramdage ajanaban agaramgaman. Solomon rajan gadlamlangten er-handramdage ajanaban abmele, kuddub er-handramdage. “Uyungan a jaita a deten a kuddub lanumanji hen gijlai do gijba, kan kudduban asanggedam. Kanate ranggen gongle a hamtaben ambrij” (Hanangber 1:14).

Jonas Kitungan atimangban saring aduduge yirreten, do bungsangan ajaitaba er-hangdramdage ajanaban ambrij eyeten dimadne. Okij er-handramdage ajanaban ambrij eyeten dimadne bo neban ajaitan, orde Jonan amang-ling danukkan awrle bubudan kun neban araihlen asan, itente alumu amangban dakule.

Anab-bagu-lingan, ateng amandranji asuyeman absidleji anin kun ambrij alumlen asan. Kun asan, anappai Pol gamle: “Yante gamle buteja Kitungan asuyem-taniyan a hangben asan adnardoije, yante gamle -iteja asangi’en a j’edan gurdeble adnabkalkalben, yante gamle kun batte atenganji pansardidam adde eji” (Ebri 12:15).

Kitungan janang tiyle surda asuyeman Sola d’ong. Butente asidlen a peku iyeten saijje, kun ayam hangle Kitungan asuyeman, do Israel abmele raja abme’eten. Bindo anin Daudo a d’ong asanggemle. Anin kun ate adsaiad angante Daudo a d’ong abgugule senleji. Anin Daudo a d’ong atuabben abmele iyeten butente a d’ong Kitungan batte sanedan dele.

Kan asan Kitungan Sol amangban saring asuyeman pangle yereten, do anin sonuman hamle. Do akarahidan boi boi kalkaldam dakule.

Tanahimdam Kitungan a onagji, kinsanan, abruna do banadraban mandran a d’ong abs’idte asuyeman saring. Kan ambrij ayam-lingan, bogad amben tanamadan tiyle tanimyiman batte abhanalenden dile mandranji amangban, etiden amben surda asuyem-lingan dakutaben.

Okiy Kinolbe absele: “Iten asan gamlenden mangba ben dajing mandranji loihle ganleji. Aninji aparamangtan saring km) a panadrad banaihan a hangben asah tungna. gamle anapsuijan deleji. Kitung Ken asuyeman obseng bandale, antate pansardi ogir baran abmeleji, bar aboina Dane Mar do Gamang len Jisu Kristun a d’ong adnabpengbaeji” (Judan 1:4).