Aug 22 – Gardin a Ganablun!

“Tanimyim maran anabpara dernadage, bindo asanggem maran a kurkurtaman janoldadage” (Bangsa Hanang 27:6).

Gardinji, d’ongben timyimtabenji, danukkaben, barabenji do er-t’ulbenji ja ganlutteji bar sayamtabenji. Aninji butteja a d’ong janang adgadlameji, engale aninji d’ongben sagaltabenji do baralingbenji maidamle lumteji.

Bindo gardinji do enegoi amandranji aninji abmele hangdrangan abmele sattang. Mandran ogandite bo mandra sattang bogad bo bigardamaran a d’ong batte orde bo bigardamaran a d’ong, handramle a d’ongan batte kuddub janabanji abhanatai. Aninji er bangsaberanji batte aninji kanikuni-lingan ads’idamtenji, iteja ahangben asan. Do atanakud-lingan, aninji absuiteji aninjidaman abmele, engale Judan Kitungan a d’ong kurkurtamle timle.

Butente saite bangsa gardin, bangsa tanimyiman absuite kun mandran abmele along-uggaran saring. Amben ateng gardinji gardi-ling arabtite, bo bangsa tanimyiman batte do barij timyimle, ateng mihnum deleja kun batte radu tanimyiman dakute. Jardidage atanimyiman na radu do bangsa abmete kan kudddub lingan. Bogad amben gardin abmele , gardiben batte ateng ayaman adakuben dete. Do anin abmele galamben. Amben aninji ampara abmailen ja, phone batte arberba orde sitin batte tanimyiman absuiba.

Kitungan Jisun d’ongben a saiben yiraiten do sanangben depsangle, d’ongben batte a gardinaben asan. Anin gamle “Gija, Hen sanangban tanangle debsangtai. Bogad buteja sarrangHen amdanglenden, do sanangan rzsanglenden, Hen anin amangban gantai, do anin ampara Hen, bar Hen ampara anin a gagatenai” (Anabpungge 3:20).

Kan ate Anin a surda tanimyiman asan, Kitungan ruangan saring labsolai do ordarba yiraite, d’ongdage do mihaman d’ong batte arakkaddangan tambetle Anindaaman pangle. Yang kan ate anlen abyarlepo raptitabe Kitungan a d’ong? Bogad amben barij garamgaman agalamben asailenden gardin agaramgaman, amben daman atiyj’enaben dete Kristu a tanimyim-lingan, kalobori-lingan atanimhiman abmele ogandiba do Kitungan a d’ong senba, do ganardin do tanimyiman barij debendete j’e-ling-ben!

Bo bangsa kaninan daku Kitungan Jisun a tanimyiman abmele: ‘E tanimyim janibjibnam, er-bandage, tangor-lingman ahanaben dete’. Angante amben akinte kan akaninkinan, j’e-ben barij banangsan batte barij dete. Tanahimdam Kitungan a onagji, bogad amben absuileden buhangdage atanimyiman mandrengna-ling-ben, buhangbenji do tonanbenji bo surda anabsittan deteji.

Okiy Kinolbe absele: “Tanimyiman uywb-ayam-sanayen na, do asuyemlangten. Tanimyiman idaldageted, Tanimyiman kinsadage ted do lzngnadage ted” (1 Korintian 13:4).