Jul 27 – TAI JUN HI PAISHE ISOR LAGA MOROM!

John 6:9 “tate ekta bacha thakishe jun logote panchta bajra laga roti aru duita chutu maas thakishe.”

Itu padh te, ekta bacha ke naam loi ken ease. Hoilebi itu bacha laga bishi jankari di kene nai, ekta kotha bishi sapha ase – ki tai Iosr laga morom te bhorta thakishe aru tai icha kore ki tai logote ki thakishe itu sob Isor dibole.

Kilekoile tai bishi gehra icha Iosr karone thaka nimite, ki tai itu jongol te ahishe hunibole Iosr laga kotha. Tai laga ama tai ke khali hath  pothai diyanai aru dishe taike panchta roti aru duita maas. Kilekoile utu bacha tu bukh lagishe Isor laga kotha nimite, tai nijor laga gau laga bukh ke dhyan diyanai.

Aru itubi bishi achurit ase ki tin din paar hoa pichete bi utu roti aru maas tu biya hoanai. Sadharan hisab te groom din khan te khana khan joldi biya hoi. Hoilebi utu roti aru maas toh biya hoanai. Aru itu bi yaadgar thakishxe ki chela khan pora utu bacha ke roti aru maas ke mangishe. Tai khan itu ke sorom bhabanai ekta bacha pora khana ke mangibole. Tai khan itu bi bhabna koranai ki tai khan utu bacha ke tai laga khana khabole thaka ke chini ase.

Utu bacha bi bishi kkhushi hoi kene utu khan ke dishe, jitya chela khan pora tai ke mangishe Isor karone. Judi tai nishthur thakishe koile, tai kitya bi utu panch hazar manu ke khilabole laga bhag te ahibole thakanai. Hoilebi itya, tai khaishe aru bhorta bi hoishe, aru achurit kaam laga hissa hoishe panch hazar manu khan ke khilabole para laga khali Isor laga morom nimite. Khali apuni dile Iosr ke, apuni laga anondo tu pura hobo.

Itu kissa tu ekta bhagor lagi thaka yatri laga ase reth laga jag ate. Tai bishi pyas lagi thaishe aru hekh te paishe tipkol ekta manu laga ghor te. Tai utu kol ke cholabole khuchis korishe, hooilebi tate pora pani ulabole paranai. Titya tai paishhe ekta ghara sapha pani laga. Tate ekta  kotha chipkai kene thakishe juntu koi ke, judi apuni pani bishi lage, morom pora itu ghara laga pani ke cholabi, utu kol te, tinihoile apuni pabo bishi pani khabole aru gau dhulabole. Utu yatri bi manishe aru dhalishe pani ke utu tipkol te, aru tai chola shuru hoishe, aru tai bishi pani paishe khabole bi aru gau dhulabole bi. Bhabna koribi, judi tai nishthur thakile tai khabole thakishe utu pani ke aru tai laga pyas bujhabole thakishe, aru utu pora khali pyas hi bhbujai kene thakibo aru tai pani laga labh tu bhal pora pabole thakanai.

 Itu padh te aji laga din nimite, utu bacha ki thakishe utu tu bishi komti thaka laga ase. Hoilebi jitya utu JIsu laga hath te ahishe, tai barhi she aru bhorta korishe hazar manu khan laga zaroorat ke. Isor laga bacha khan, khuli kene Isxor ke dibi. Tini hoile apuni bi pabo Tai laga morom ke aru Isor pora apuni ke ashirbaad dibo bhorta kori kene.