Jul 17 – Butente Batturten!

“Bindo butente tanakkud swikkoija sayele dakuten, anin ranabraban hangte” (Mattiu 24:13).

Mang-ling-ben ite-dakuleja name ayam-ling – kan ate bara, kznol, arsanu orde andidna, kan murdadam amben attadkudben dete. tungaa-lingan bogad amben akkadab-linanden iteja hangdrangdage ted. Kitungan d’ongben saite engale amben adertenan ambrij dile aym do atanakud-lingan dainan ahangte.

Abrihna-lingan ateng mandranji, butente abmante aninji sattang uyulkuijan hangteji, do kuddubanji ate bo erobjongdaage aganijgijan batte gijgijteji. Bindo Kristu mandrengnaa lingan, kuddubanji butente abrihdna ontungteji uyulkuijan taniyan dete. atanakudan sikoija butente batturlen dakute aninji uyulkuijan hangteji antate mandrengna ranubaban.

Ateng kanalkalan dakute, arasudanji, anabkalkalan do banzmbzman, kan ordar-lingan. bindo ataanakudan sikoija butente batturlen daakuten, aanablun hangte. Anteng mandraanji atanakudan sikoija adakuneji. Aninji bigardanji angante d’ongan kanikun gamteji Kitungan abmele. Angante aninji kaaan ambrij asurpidamna-lingan dakuteji, kanalkalan do er saanai-lingan, aninji Kitungan abmele aitsumanji hanmle adraptieji. Anten asan, aninji a dernanji  do kan ordaran batte labyulen dakutenji.

Bo bernan daku akahidan ayo iteja kanalkalted, engaale d’an yireten kun ambrij a d’ongan janang dele. Bindo kun ambrij ted ameng ayon, anin endalen ayirben dete, do kuddub kanalkalanji asaiben dete. kun ambrij, bogad Kristun – mandrengnaben amben aampara daku, aaambendman kan ordar akanurkuran saring raabrabdamlen adakuten.

Bo denna moloi gaardinji enegoi hangnaba yirleji kun ayamlen ateng mihnum, bo surda boropon adakun abaruban. Barij hangnalingan ayam, aninji barun daileji, aasun, er-ranaptige er sailebe sayun batte. Bindo bo mandran kuddub kanalkalan batte atanakudban ardueten. Anin a baran batte aa d’ongan aanabgugun dele do hangle ordaran aganugun barijloge.

Nami amben sanengsengben ruangan a baruban arduben dete, Jisu Kristun asanilgodan sanle. Amben adukkadongne, itedele akanalkalan. Atanakudan sikoija barij tiydaamnan batte arduben dete. bibol-lingan anlen kznoltabe: “Bindo Jisun anin a d’ong gameten, Buteja a s’in mirdi lingan hamle bogad daiyargudlenden, anin Kitungan a rajam apsele tungna ted” (Luk 9:62). Tanahimdam Kitungan a onagji, amben atanakudan ayamban ardulai do anten asan Kitungan adamban dakunaba. Baatturlen daakunaba, aabriylen Kitngan amangban manarid-lingan, do mandrengna ranubaban hangba.

Okiy Kinolbe absele: “Itente a kanalkalan aman satid samoihge a deroite, antate bantong dong. Gija, asui ayam lingan yante gamle amben tanun-engan rapti a dete, kun asan duaih suman amben dajingante karoijosing lingan pidroite, bar galji dinna sikkoi ja amben kanalkalan a hangte, karahidan sikkoija demadage dea, bar Hen mandrengnana rqja ranubboban tiytam” (Anabpungge 2:10).