Jul 02 – Butente Basute!

“Benjamin apsele anin gamte, Anin GAMANGtungan a tanimyim mar; anin Anin adamban erabmuij basute. Do Anin tamparub anin a d’ong turturte, bar anin Anin a bagu kaparda a tarangdi lingan basute” (Bagujuanaber 33:12).

Nami manglingben Benjamin ambrij anabsittan atiyben asan Kitungan aitsuman. Angante Mojes absittale Benjamin a ompu, anin gudingle ‘Kitungan a tanimyiman’.

Karukkudan ayaman, a hangan adhimle Ben-Oni gamle, agaramgaman ‘danukkan a Onan’. Bindo a U’an bandaale ahiman ‘Benjamin’, agaramgaman ‘jandru’um-sin a Onan’. Jaakub mijgal a onan dakuleja, ‘Benjamin sattang karukkudan dele kanan-lingan, Bethlemban. Do ateng babyele Kitungan gamle ‘Aman tanimyim do aman bangsaale dakuten Hen abmele”.

Kitungan gudingle tanimyimdam gamle, ambendaman atiydamnaben dete abm’oihben abmele. Anin a m’oihten ambrij abara alumben dete. Angante amben agijte Kitungan a d’ong Jisun, Anin gamle: “Bar butente appailih, Am’n Hen ampara daku; Anin ansoi-Hen adnumdrenglih. Iben asan gamlenden itente Anin a d’ong abm’oihte antate tordong ayam Hen lumtai” (Jon 8:29). Angante mandrengnaben Kitungan a man’oihan, Anin d’ongben adrumdrenge do akkaridae. Anin amben ampara dakuten do abdainataben anabsitta tiyle Benjamin ambrij. Anin anablu-lingan adakuten. Kitungan jzbjzble Anin ampara adakunaben asan do anin ampara ayerayer manengba adakunaben abmele.

Bibol-lingan gamte ‘asuyem-lingan abasuben abmele’, kan ambrij English batte gadlalangten: ‘anablu-lingan adakunaben’. Kitungan sattang haadab anablun tiyte. Do Kitungan jzbjzble adarakunaban adakunaben asan dile tordong abmele, ajardinna dile ayam rabte mandrengnaben, kuddub sanaisailenji tiyte do pwrardaben abbangsate.

Bogad ordar-lingan ranabraban adakulenden, ateng kanalkalanji batte do tanunjinganji batte. Sonuman ajardigodan adkabdabte itente anlen ahangben dakute. Bindo Kitungan dile ayam d’ongben tangorte. Bibolan gamte: “Gamangtungan kuddub anerszn saring d’ong-nam rabrabte; Anin pwrarda-nam rabrabte. Nami saring tarda ayam sikkoi ja Gamangtungan aman a dungtenan do a gantenan adnang d’ong-nam rabrabte” (Sanenken 121:7-8). Tanahimdam Kitungan a onagji, Kitungan a d’ong abm’oihben abmele oskainaba. Bigardanji abmele amben batte banandan adeben dete do amandrengnaji, do Kitungan a ganijgij-lingan dakunaba. Etiden amben Kitungan batten anabsittan ahangte.

Okiy Kinolbe absele: “Itsum-Nam abojoraiben asan d’ong-hen hanangan ti-ih, iten asan gamlenden Aman na Kitung-hen. Bangsa Janggarda-Nam d’ong-hen rojolgod lingan abanjengihte” (Sanenken 143:10).