Jun 18 – Er-Dainan ayam-lingan banabyen!

“Sanun a dinnan abmele kurtan anoskaian dete, bindo dainan Gaamangtunganate” (Bangsa Hanang 21:31).

Tabme anabsittan batte Kitungan bandate er dainan a tangoran. Danukka admadrangdong, amben er dainan a hangle janang. Kitungan amben ampara daakuten, Anin bandate er dainan saaring anabdainaba.

Nami mandranji banangtong janggarda-lingan dakuji. Ateng janab-lingan anin bangtongteji: aninji bimbim-lingan galuteji gamle, abaranji s’zdte gamle, bigardanji asanggemtelenji gaamle, aninji atanongbanji batte gamle, apasijanji s’zdte gamle, mandrengnalen iten dete ayirtahen ayam gamle banantong-lingan dakutenji. Kan ambrij aninji daakuji. Bar kan batte, aninji er dainan hangteji, kan ate detena. Buten er-dainan hangteji bagu bernan yirtai. A j’e-lingan danukka barij dete. orde aninji bangsale ogandile barokij aninji er-dainan saaring anabdainan dete.

Aboina atgi tambigarda barate. Berna asan, er marid samananji abjuntudte, kuni a togi solda abjuntudle abraddute. Er dainan ate detena, kan ordar-lingan amandranji, danukkan do er banangsan batte dakuji. Kitungan amandranji aninji halen raptiteji edana-godan saring Kitungan asanayam batte do banangsa banandaba. Kan abmele akaridadong, Kitunglen tiydamlen amangdrengna.

Kan ate ajardinnaa mandran edon kutta-lingan er-dainan hangle. Anin a d’ongan sonuman batte hanaaman deandele ganadlun dele. Bindo Kitungan mandran a d’ong er gadlulaben dakule. Anin anarin saring anabdainaba baandle. Kalobori-lingan amihaman lale bar kun amihman batte, asangemmaran ad’ong gaablule do dainan tiylai.

Gojalan tangan dele Jisun a s’i-ling, mandrengna-ling-len, kubijan ambrij baralen. Anin kuddub anarilenji bandale anabdainaban. Anin abaldungle kuddub itente mandrengna-lingben dakule, do anabsitta hamdramdage  abmebenten. Barij danukkaben do er handramdage saring, bandale asuyeman ahamdramdage ajanaban. Tanahimdam Kitungan a onagji, Kitungan a d’ong abguguba Anin d’ongben dainan tiyte, bo surda j’en batte.

Okiy Kinolbe absele: “Bindo ayengan a Kitungan dile tordong Kristun batte dainagod lingan abanjengtalen, do dile darakuna lingan Anin a ganalam sanarwman anlen batte abpemengte, Anin a d’ong sanensenan de-ete” (2 Korintian 2:14).