Jun 17 – Ahram kandi thaka te!

John 20:15 Jisu taike koishe, “maiki, kile apuni kandi ase? Kunke apuni bisari ase?”

Kiman bi ahram thakishe pare Mary Magdalene karone, hunibole itu mitha kotha ke Isor laga! Tai iman utsuk hoi jaishe ki tai Isor phine ghuri kene chillaishe ‘Rabboni’ koi kene.

Isor jun pora taike hudishe ki kile tai kandi thakishe, taike itu mahima dishe Tai laga chehra ke dikhi pabole mori kene utha pichete. Mary laga mon, jun hi kandi thakishe ekla Samadhi te, khushi pora hi uchli she. Tai itu avsar paishe sabole uthi ja Isor ke nijor laga suku pora, tai laga sob kandi thaka ke loi jai kene, khushi aru anondo pora hi bhorta kuri kene.

Pobitro kotha te koi: “aru Isor pora mushi dibo sob kandia ke tai khanlaga suku pora; tate mora laga aru nathakibo, nahoile dukh, nahoile kanda bi nathakibo. Tate aru bikha laga nathakibo, age laga saman khan jaishe”. Revelations 21:4.

Ekbar raja Hezekah kandishe, kilekoile tai tayar thakanai mora laga samna kuribole. Tai icha kuri thakishe Isor ke tai laga umar ke barhai dibole olop saal nimite. Pobitro kotha te koi ki tai nijor laga chehra ke wall phine lagai dishe, aru prathana kurishe Isor ke aru tita hoi  kene kandishe.

Isor pora Tai laga kotha Hezekiah ke pothaihse, prophet Isaiah pora aru koishe: “Ami apuni laga prathana hunishe, Ami apuni laga suku pani dikhishe; hosabi, Ami apuni laga din ke 15 saal tk barhai dibo” Isaiah 38:5. “hosabi Aami apuni ke changai kuribo. Aru tisra din te apuni jabo Isor laga ghor te” 2 Kings 20:5.

Apuni laga suku pani pora Isor laga mon hilia dishe. Tai apuni ke kitya bi nacharibo. Ami khan pobitro kotha te poribole pai, kinika Tai nijor kandishe tai laga ministry laga poila din khan te. Tai kandishe ekta manu nimite, naam Lazarus karone. Tai kandishe Jerusalem nagar nimite aru itu laga mukti nimite. Tai Baba ke saishe aru kandi kene prathana kurishe pura prithibi nimite, bishi mon dukh hoi kene, Gethsamane laga bagh te.

Isor laga bacha khan, Isor pora apuni ke sai aru apuni laga suku pani ke, itu khan ke mushi diye aru apunike ahram diye. Tai apuni ke bachai, aru diye shanty, dilasa diye, aru Tai apuni ke chari kene kitya bi najai.

Aji bhabna kuribole laga pobitro kotha tu hoile Isaiah 25:8 “aru Isor Johovah pora mushi dibo apuni laga suku pani khan ke apuni laga chehra pora; Tai nijor manu khan laga dukh ke Tai prithibi pora loi jabo”.