Jun 15 – Tanangsoijan ayam-lingan banabyen!

“Dele janangden Hen tangsoihen ted, iten asan gamlenden U’an Hen ampara daku” (Jon 16:32).

Tangsoijan ayamling boi boi asudage dete do danukkan j’e-lingan dakute. Bar baraben batten, bogad birindabenji sagaile do dakulen do sagai dakulen, kuddub ambendaman, kan batte j’en abdukkate.

Angante tanimyim-maranji sagaite, amben ahangte tanangsojan. Mangbaben ateng mandranji dakule janang birindalenben, bindo buteja tanimyiman adnabsujeji do banangsa mangbaben, orde bogad aninji arditabenji do er bangsan abmele aberna bertenji, amben garoidataben s’ing-ling-ben.

Itejanang a kanalkal-lingan, a karidadong Kitungan amben ampara daku gamle. Anin atanurdun amben ampara dile ayam dakute. Anin asanayaman manglingben labsotai dile ayam.

Jisun Kristun gaamle Anin ansonted, U’an janang dile ayam dakute. Kitungan amangban adakunaben do atanurdu-lingan abasuben asan, Anin baruban yirre do mailen U’an batte. Anlen Bibolan gijtabe angante arakadangan tambedle, Anin atanardun Anin ampara dakule.

Enok janang anson dakuneten Kitungan batte arberben asan man’oihan batte. Anin abmele, Anin ateng m’oihlen do sakki ambrij tiyle, Kitungan m’oihle. Ad’ongan ganudingan dele Kitungan atumadgijmar, do ayirtaih a bernaji janang obpunte gamle, do rabangtabe bibol-lingan janang.

Noa, angante bungsangan gabdile, ateng mandranji amangan saring anomdrengan dele do a birindanji sattang anurungan dele Kitungan batte. Anin anson Kitungan a berna hangan tiyle dakulen, do kuddub ganarojan hangle, gabroile ma’angleji a d’ongan. Bindo anin adkabdabnad. Atanakudan sikoija, anin bo surda dainan do ganugun batte Kitungan a bungsang-lingan ganleji.

Jakub, janang anson tanangle Jabok abmele, a kakun abanangtong-lingan Eson a d’ong. A kuharan saring janang ranabraban adhangad, abirindan tangsoi-leji. Bindo anin banangtongan do tanangsoijan batte yirle, amangban. Anin kanalkalan hangle do Kitungan amangban garle anabsittan . Do anlen galamtabe jakub abmele anabsittan Kitungan atiyle ate do abtangorle aurungaiten ate. Tanahimdam Kitungan a onagji, tangsoijben adnang janang Kitungan absittataben do babyetaben.

Okiy Kinolbe absele: “Hen d’ong-ben kundrasijge abmean abmele adnomdaben. Hen mangba-ben yertai” (Jon 14:18).