Jun 05 – Kanalkalan ayam-ling a Suyeman!

“Amben a uggaran galaih piyaihge dedongete, Kitungan amang lingan dernaba, mang-ling-Hen ja dernaba” (Jon 14:1).

Buteja kan ordar-lingan edalen adakune do a uggaranji anabkalkalleji. Kanalkalan aboi sonuman apangtaih ate. ateng mandranji, angante aninji kanalkal-lingan dakuteji, aninji adnogandieji itente aninji alumlenji batte kun kanalkalan adeten ate. ateng mandran kudilen dakutenji.

Ateng mandranji er bangsa beran amdangtenji batte galaipiyange deteji. Ateng mandranji arsuda-beranji amdangteji. Ateng a mandranji banandraban batte, kudilen do kanalkalan dete.

Kitungan a o’nan ambrij, amben j’e-ling-ben a kudidongne. Kun kanalkalan ayamlen Kitungan amangba dakunaba. Mandran a sanayam asaidong, bindo Kitungan atimangba gobba. Bibol-lingan ateng mandranji daku yangam aninji kanalkalan saring anablun hangleji, aninji Kitungan amangba a dakulenji asan.

Bo dinna angante Jisun do a hanangna-maranji bungsang-linganyirleji, bo surda rangen do ganungan-lingan bungsangan kodi-kota dele, aten asan surdale yireten. Hanangna maranji bantongleji. Bindo Jisun dimadlen dakuneten. Do hanangna-maranji tartarleji do gamleji: “hanghang, anlen s’ilangten kan abmele adnogandie po?” (Mark 4:38).

Anin dilen do abringnalen rangen do ganungan a d’ong gamle, “Ringna!” Do bo surda ringna dele. Bindo Anin a d’onganji a d’ong gamle, “Iten asan a bangtongte? Yangan amben kan dirnaben agasa?” (Mark 4:39-40).

Anlen janang kinoltabe bibolan Hanna abmele ayengan a J’en tiydamlen Kitungan amangba. Do Mary bo bangsa baran lumle Kitungan a jingban goble. Amben janang Kitungan amangba yiraiba. Dile ayam abmele Kitungan amben ampara dakute, Anin rumang baran lumte do Kuddub kanalkalanji saring ablutaben.

Bibolan gamte: “Bute-janang dirtenji aninji absideji” (Jisaiya 28:16). Kan a bernan ambrij, bogad amben kan ambrij alumlenden dirnnaben agasa gamle ganalaman dete. Tanahimdam Kitungan a onagji, dirnaba ateden Anin kanalkalben saggaile abdainataben.

Okiy Kinolbe absele: “Etteden Kitungan a itente a sanabyun kuddub ganalaman padte, antate Kristu Jisu lingan uggaran do anogandi benji turturre rabrabte” (Pillipi 4:7