May 05 – Jznjzn Bangsa Yanarm’engan!

“bzgarda maranji karran satid, samoihan hangan hangle d’ongan a ranabraban aja-adji, yante gamle bo jznjzn bangsa yanarm’engan aninji rapti hangteji” (Ebri 11:35).

Bibol-lingan, anlen gijtabe yanarm’engan abmele janang bo bangsa yanarm’engan abmele. Anlen kinollabe kan ambrij: “Abmang yanarmeng -lingan mittub dane maranji man’oihdam do mariddam na” (Anapunggi 20:6).

Ebri 11:35, a susuna-lingan anlen kinollabe insalonji yanarm’engan batte a kahjd maranji a d’ong am’eng hangleji. Dernna batte, karahidan m’engleji ate gijleji. Dernna batte, tuamdgijmar Elishaya, kahid mardun panglai jerepathan juarbojan, yarm’engle. Dernna batte, Elishaya yarm’engle, Shunammite a insolan a kahid o’anan adyerm’engeten.

Tabme anosaaij-lingan, aanlen kinollabe ateng karahid maranji abmele, yarm’engleji. Lajar, Jairus a dangardi-o’nan, Dorkas,  ahiman Etikus, yarm’engleji. Titte ateng Kitungan abadlohim-maranji dakule, ayengan amandranji karahidgodban sannle yirleji, do yarm’engleji. Angante kan kudduban bangsadam, aninji aboi anegoi a yarm’engan ambrij dele, kun kuddubanji akahidben dete, delejanang. Kun ayamlen, ateng Kitungan abadlohim-maranji dakule, ayengan amandranji aninji daman bo surda karahidan ambrij dele, do tiydamlenji aparamangta yanarm’engge.

Apurban a denna-lingan sarebasinganji, romi dane maranji dakule, bakurdi dirna buhanganji do tonananji a d’ong tolbadle sayu boropo-lingan dakuleji. Anin gamleji amben Jisun a d’ong anumdrengleden kan sayu boropo lingan kahidtaben. Kan ate amdangle, do erabjonjongdage anabkalkalan, kun bakurdin saring bo mandra ate jisun amanglen a dena d’ong omdale yireten. Kun ayam-ling, Kitungan dane maran amadan rile, do gijeten ruangan saring pisirdianji alabsotaihji ate ganugu batte. Kun bakurdi pisirdianji saring aboi pisirdian ate danukkan batte donglen ayireten ate, engale bo mandran umdrengle dernnan batte Jisun a d’ong.

Kun batte dane maran galamle do Kristu maranji a dernna bo bangsadam gamle. Anin galamle iten asan Kristu maranji bo dernadagge dakuteji, atanakudban sikoija, karahidan sikoija anabkalkalan dakute, Kitungan aranubbanaban ahangben asan. Itente anin galamle, anin abrijle iten anin sayu boropon lingan dakule adkudben asan, surpidamlen Kitungan amangba gameten: ‘Hen jatai Jisu Kristun a d’ong aboi anablumar-hen gamle. Mandrengna ranubaban sanaisai do bo bangsa yanarm’engan yangtai’. Do ayengan a pisirdian dunglen yireten, ateng m’oihle mandengna aranubaban atiyben abmele kun dane maran a d’ong. Tanahimdam Kitungan a onagji, dernadage dakunaba tanakudan sikoija mandrengna-lingben, bo bangsa yanarm’engan a hangben asan.

Okiy Kinolbe absele: “Iten asan gamlenden ruang sura-kompedan saddate, do karahid maranji er-san’oge yanarmeng anabdznan hangteji, bar anlen banandan detabe” (1 Korintian 15:52)