Apr 27 – Kanuban pangle Senkendraba!

“GAMANGtungan apsele Anin ahiman tungnaloge abgugule senba; bo kanuban pangle Anin amangban yeraiba! Amben manaridan a lanangga lingan GAMANGtungan a mukkaban senpwrba.” (1 Birinda 16:29).

Bibolan gijgijba hangam a senben dete kun abmele Iten gamlangten. Gamte anlen Kitungan a d’ong a senben dete kanuban batte. Kanuban aboi tanimyiman absuite, a lung-j’elen saring. Itente manglinglen daku tanimyiman do panemengan Kitungan abmele. Kanuban janang sanensenanna.

Angante Jisun Kristun karukkudan dele kan ordar-lingan, darungyung saring ganalam-maranji, a rikka-sin anin adyirlaji asenben abmele a d’ongan. Aninji bo bangsadage a kanuban panglaji. Bibolan gamte: “Bar aninji s’ingan ganan ganle anin a yangan Merin ampara passijan a d’ong gijleji. Bar turduman turdum-le anin a d’ong lemsenleji. Do a peladamanji akudle, ranan, liba dasardan, murna dasardan anin a d’ong ganitian tiyleji” (Mattiu 2:11).

Kitungan agamage kanubben batte, orde amben itjaja ahangtepo kan batte Kitungan amang saring. Kan ambrij, Kitungan amangba amben absuite a tanimyiman, do abpemengte kan batte. Angante anlen saitabe Rajan a d’ong, a j’e m’oihte, bogad amben taniytiyan apanglenden. Bo surda tanimyiman gadilte Raja amanglen amben abmele. Do kana yam-ling, anin barij gamle tiytaben itente amben agarte.

Kan ambrij, gardinji orde surda maranji ajaben daruina endanasingban, bo tarban do tanortalan orde s’inrin batte. Buten buten ate j’on batte jateji. Kun ambrij ajanaja, kun ajanaja man’oihan pangtai. Kun ambrij alumtenji, aldung birindanji janang abmainate do anasangemanji dunglen yirte.

Kun ambrij, bogad amben Kitungan amangba ayirlenden bo surda taniytiyan batte, angante amben asenkendrate, Kitungan a j’en m’oihte. Bindo amben agalamtepo iten bangsa kanuban? Kan ate ambendaman atiydamna. Romi kambolan ambrij 12:1. D’ongdamben atiydamte mandrengan kanuban, manaridan do Kitungan a janaja.

Tanahimdam Kitungan a onagji, Kitungan anindaman tiydamle arakadang-lingan, engale ameng-kanuban, pintun saring abluben asan do bo tabme mandrengna atiyben asan. Anin amihaman lale anlen abmele. Iten a kanuban atiyte bo surda tanimyiman batte a d’ongan?

Okiy Kinolbe absele: “GAMANGtungan saring itente a kuddub banangsan hen hanglai, kuni apsele hen Anin a d’ong iten rapti abyardultiyai? Hen anablu pinsamanan hamtai do GAMANGtungan ahim lingan garbertenai” (Sanenken 116:12-13)