Apr 23 – Tanimyiman do Sanensenan!

“GAMANGtungan a rondardi linganji a dakunaben asan pwrarda-hen angtzrte; u u, pwrarda-hen lingkij ongkijge dete. Am’eng Kitungan apsele j’e-hen do jelu-hen man’oihan asan kenteji” (Sanenken 84:2).

Tanimyiman jznjzn murdadam sanensen-lingan. butedeleja Kitungan a tanimyiman batte barij dele, anin Kitungan a d’ong senkendrate, barij j’en batte, barij ranaptin do barij pwrardan batte. Anin senle bar barij Kitungan a tanimyiman, sanenkenan batte lumte.

Amben tanimyimben absuiben dete. Angante amben bo pasijan agijte, a d’ongan tanimyiman batte abdite, akurkutamben do amainaben Anin batte oskainaba. Angante amben arabangte gardibenji, siben batte alimte, bar manangan batte arberte. Kitungan a baranling, siben hamle andruku agarberten. Angante bo surda maranji arabangte, alimle tanimyiman batte. Bar amben mainabenji ajate, laliman do bo bangsa beran batte.

Bindo amben ogandiba hangam Kitungan amang absudamte. Amben d’ongdage amadan batte addgije, orde siben abjunle limle adrabtie, engale amben ordardage amandranji batte alumte. Amben tanimyiman batte sattang absuiben dete anabgugun do sanensenan batte. Bibolan gamte: “Kitungan Janggardan 113, bar bute bute Anin a d’ong senpwrteji, aninji Janggardan do janardin batte a senpwrben dete na” (Jon 4:24).

Daudo Kitungan a tanimyiman batte barij dele.  Aten asan kuddub  sanenkenan, kaninkinan batte barij daku. Anin sattang adtimyimad Kitungan a d’ong, bindo barijloge Kitungan a sarebasingan timyimle – Kitungan a d’ong a senkendraben a darakuna. Sanenkn 26:8 gamte: “Gamangtung, hen timyimtai darakunanam, do uante panemengna daakute”

Tanahimdam Kitungan a onagji, barij j’eben batte Kitungan a d’ong timyimba, barij ranaptiben batte bar barij pwrardaben batte. Angante kan ambrij alumte, amben dakule adraptie r senlabe. Sattang butente timyimteji, atanurdun saiteji barij tanimyiman do sanensenan batte.

Okiy Kinolbe absele: “Bo ajar dinnan bzgarda darakuna lingan a dakutenaian saring, bo dinna rondardi-ling-Namji a dakutenaian bangsadam. Duaih maranji a tambusing linganji a basuben saring Kitung-hen a s’ing lingan turtursang maran a deben asan hen awr itsumtai” (Sanenken 84:10).