Apr 21 – Gamangtungan a d’ong Senba!

“Gaamangtungan apsele Anin ahiman tungaloge abgugule senba; bo kanuban pangle Anin amangban yeraiba! Amben manaridan a lananggan lingan Gamangtungan a mukkaban senpwrba” (1 Birinda 16:29).

Gamangtungan a d’ong senba, kan ate murdadaman a berna Kitungan  d’onglen agabdilen ate. Anin manglen saring ateng sanaisai, itente anlen gijle raptitabe. “Kan a mandrenji a d’ong Hendaman apsele gabdelai, yante gamle aninji sanekendra-Hen abpemengteji” (Jisaiya 43:21). Kan ordar-lingan kuddub mandranji saring, Kitungan d’ong-ben sedale Marid mar gamle. Amben abgugule do asenben dete Kitungan a d’ong kan ordar-lingan do ruangdage aganijtan.

Angante amben Kitungan a sarebas’ingan ayirte, amben Kitungan a d’ong asenkendraben dete. amben kuddub asuyeman ahimle senba. Bibolan gamte: “iten asan gamlenden Anin Kitungben , senba” (Sanenken 45:11).

Anab-bagu-lingan, angante amben sarebasing-lingan a dakute, amben sattang agarberdongne, bindo dernaben absuiben dete. amben dernaben asuiben dete sanekendran batte: ‘Kitung, amang kuddub ordaran do ruangan gabdele. Barij kudduban aman gabdele, Aman ordarban yirre d’ong-daman tiydamlen arakadang-lingan, pintun saring abluben asan. Hen dirtinai, Aman barokij yirtai kan ordarban’…

Bo dinna Jisu Kristun gijgijle bo kardu-maran akarukkudan saring, a Suyeman dakule amang-lingan do absamangle bo joba-solan batten. Angante amadan rille, kun mandran man’oihan batte barij dele. Angante Jisun rabanle a d’ongan, Anin gamle kun mandran: “Aman Kitungan a Onan amanglen dirtenpo?” “anin gamle, “Kitung, Hen dirtenai!” Do anin senle” (Jon 9:38).

Anab-yagi-lingan, angante amben sarebasingban ayirte, amben a d’ongan asente. Angante Daudo apardi-onan absidle, anin gamle: “Bindo nami anin kahidle. Iten asan hen anamnai? Hen passijan a d’ong barokij abyarm’engle raptiai po? Bo dinna hen anin amanba-hen rapti daiyerre adyerai” (2 Samuel 12:23). Ajardinna, Kitungan a sarebasingan, anabasuyeman adarakuna.

Tanahimdam Kitungan a onagji, Kitungan a jingban saring amben asuyeman saiba! Angante amben kanalkal-lingan galutaben, Kitungan a sarebasingan yirba do danukkaben gadlamba. Do Anin asuyeman tiybenten, sanabyun do anabsittan.

Okiy Kinolbe absele: “Ojiya rajan kahidlen a minhum lingan, hen Gamangtungan a d’ong abo langka do gugu raja-garobgob lingan a gobgob gijlai. Bar Anin a raja-kaban sarebasingan badrijle” (Jisaiya 6:1).