Mar 02 – Tai pora dibo!

Psalms 84:11 kile koile isor Jehovah tu suraj aru kawach ase, isor pora hi dibo apuni khan ke khemai aru mahima.

Isor tu bhorta ase anugrah aru morom pora aru tai pura tagot ase apuni khan ke khemai dibole. Itu khemai pora hi apuni ke gherav kuri kene thakibo aru itu pora hi apuni ke biisor laga mahima te anibo. Itu khemai pora hi ekta kawach nishina hi apuni karone kam kure aru apuni ke pap aru biya pora bachai kene rakhe.

Ami bishi bar tu itu kotha te hi bhabna kure, ‘anugraha’ te. Bishi bar ami itu anugraha tu isor jana manu khan uporte hi dikhe. Ami bhabna kuri thakishe ki itu anugraha tu khali tai khan uporte hi thake. Aru itu dangor hoi jai thake jitya ami khan isor laga prashansha aru mahima kuri thake. Ami itu bi bhabankuri thake judi isor laga anugraha ami khan laga jibon te nathakibo, itu pehchan bi hari jabo aru taike kun dushman pora bi harabole paribo asani pora. Itu karone, ami bhabna kure itu anugraha tu kiman bi zaroori ase amikhan laga jibon te thakibole aru itu isor laga anugraha pora hi sob biya pora bachi kene thakibole.

Hoilebi kitya ami puri thake aru bhabna kure isor laga pobitro kotha khan ke, ami buje ki anugraha tu isor laga uphar ase amikhan karone, amikhan ke dishe tai laga morom pora hi, upkar aru Udarata pora ase. Tai laga sahanabhuti aru daya pora hi tai manjur kora hoise apuni ke anugraha.

Apuni kityabi pabole napare anugraha apuni laga budhi aru dimag pora. Itu uphar ase isor laga juntu ami khan pobitro atma pora pai. Nahoilebi apuni khan hodai din laga jibon pabole napare apuni laga nijor laga mehnat pora. Itu ekta uphar ase isor laga tai laga calvary pora paishe.

Itu isor laga anugraha hi ase ki apuni khara kuri ase aru apuni ke kun bi khotom kuribole paranai. Itu pura tai laga anugraha hi ase ki ami khan bachi ken ease itya tok aru prithibi laga jibon te jinda thakibole pari ase.

Apostle paul pora nijor ke nomro kuri kene koi: “hoilebi anugraha pora hi isor laga, ami ase ki ami ase, aru tai alaga anugraha ami nimite thaka tu ini janai; hoilebi ami mehnat kurishe aru bishi tai khan sob pora, tini hoilebi ami pora nahoi, hoilebi anugraha isor laga jitu ami logte thakishe. 1 corinthians 15:10.

Isor laga bacha khan, kitya bi nijor laga dukh aru mehnat upora te ghamand nakuribi. Kitya bi ghamand nakuribi apuni laga jati, parivaar, dhan, sompoti aru pora likha pora. Nomro kuribi nijor ke aru dhakai kene rakhibi nijor ke isor laga anugraha nichete. Titnihoile hi isor pora apuni ke aru bi uthai dibo aru apuni laga jibon te sob kam te anugraha kuribo.

 Aji bhabna kuribole laga pobithro kotha tu hoile psalms 116:12-13, ki dibo pari bo ami isor ke tai laga sob labh khan ami nimite thaka karone? Ami lobo paritran laga cup, aru matibo isor laga naam.