Feb 25 – Mitha gunn!

2 Corinthians 2:15 ami khan as e isor karone gunn krista laga tai khan majote jun khan bachishe aru jun khan khotom hoiase.

Apuni khan nimok nishina ase itu prithibi te. Apuni khan itu duniya laga ujala ase, rasta dekhai diya laga aru ekta nagar juntu pahar laga uporte ae. Apuni khan utu mitha gunn bi ase krista laga itu pura duniya te.

Ki motlob ase mitha gunn krista te koa tu? Itu apuni khan laga gawahi laga jibon krista nimite thaka prithibi te ase. Judi apuni laga jibon pobitro ase, itu dagi nathaki kene pap, itu pora hi rasta bonabo tai khan karone gun apuni khan laga gawahi krista te thaka laga dibo. Aru itu pora hi modot kuribo tai khan ke bachabole aru isor jisu krista logote ahibole.

*Mitha gunn ke dikhabole iku kam nai. tai laga gunn aste pora hi sob jag ate pheli jai aru itu pora hi manu khan janibole pare.

Hazar madhumakhi khan phul laga gunn pora I ahi jai kiman dur pora bi. Apuni laga gawah laga jibon bi inika hi bhal gunn nishina ase jun pora isor laga morom ke janibole kuchis kuribo judi apuni muk pora nakoile bi.*

Aji laga homoi te ekat dukh laga kotha ki ase Christian khan  laga majote koile tu tai khan inika jibon thaki ase ji pora gun iku bi naulai. Tai khan misa, biya bhabna, drugs aru bodmas laga rasta te hi ase. Itu karone, tai khan nijor laga gawahi laga jibon harai loi, aru itu pora hi jisu krista laga Biswas khan laga naam Biswas nathaka khan laga majote te biya hoi jai.

Tai khan biya pai kene koi, “Christian manu khan inika thake naki”? aru tai khan pora shrap diye aru Christian manu khan laga naam bodnam kure. Apuni khan manu khan ke duita suku pora sai thakibo pare hoilebi yad rakhibi apuni ke hazar suku pora sai ase. Janibi apuni kinika jibon thaki ase: ekta bhal jun jisu lagan aa gunn nathaka laga biya jibon?

Apuni khan nijor laga jibon te bi sabole lage ki itu jibon te isor bi ase na nai, aru hudibo lage judi apuni bhal gunn manu aha laga jibon ase. Nahoilebi ekta biya jibon jote isor laga naam biya hoi ase. Itu ke ekta karon banabi isor laga naam apuni laga jibon te uthibole apuni laga gawahi laga jibon pora.

Isor laga bacha khan, apuni laga gawahi laga jiobn ke bachai kene rakhibi, pobitro aru isor laga bhoi pora, itu pora hi apuni laga jibon ke bhal gunn dibo.

Aji bhabna kuribole laga pobitro kotha tu hoile 2 corinthians 2:14 dhonyabad ase isor ke jun hi amikhan ke loi jai jitya krista te, aru ami khan pora diye bhal gun tai laga gyan laga sob jag ate.