Feb 23 – Shadi!

John 2:1 tisra din te ekta shadi thakishe can ate galilee te, aru tate jisu laga ama thakishe.

Pobitro kotha te koi ki utu shadi te jisu laga ama thakishe, tai laga chela khan ke aru ama ke matishe juntu saptah laga tisra din te thakishe. Monday tu dusra din thakishe aru Tuesday tu tisra din thakishe sapta laga. Hoilebi itu din khan te kun bi shadi nakure Tuesday laga din te. Tuesday tu ekta biya din bhabi kene utu din te iku bhal khan nakure aru utu din te kote bi naberai.

Hoilebi  jun khan itu shadi rakhishe jisu laga homoi te, tai khan bishi bhal thakishe kile koile tai khan iku biya din koi kene sa nai utu khushi laga homoi te. Itu karone jisu bi tate jaishe mon khushi kuri kene tai laga chela khan aru ama logote. Aji laga homoi te bishi manu khan ase jun khan bhal khushi laga din tu ekta bhal homoi nahoilebi din bisare, aru print kuri thake shadi shuru hoa laga aru khotm hoa laga homoi bi tai khan laga invitation card khan te. Kiman bi inika kam khan isor ke mon biya kuri thakisbo. Judi inika hiase,  ki tai bi apuni khan laga shadi te bhag lobule paribo, utu khushi pora? Ekbar bhabna kuribi.

Ahibi aru ekbar bhabna kuribo, saptah laga tisra din Tuesday te. Jisu laga homoi ppora milai kene itya tok 2000 sal hoishe. Isor laga suku te, itu khan dui din nishina hi ase. Aru tai ibi tisra din thakibo. Aru itu tisra din tu tai duibar prithibi te ahibole laga din tu hobo. Aru bishi deri nathaki kene itu tisra din tu ahibole ase. Itu tisra din tu jisu krista laga rajyo tai laga pujari khan logote hobo aru 1000 sal karone. Utu homoi te, jitya dui hazar sal par hoishe, pobitro kotha pora ami khan ke invitation di ase, ashirbad ase jun khan ke sadi khabole matishe bhera laga bacha laga. Revelations 19:9.

Ami khan laga jisu krista dulha ase utu bhera laga sadi laga. Aru girja juntu tai nior khun pora ikinishe, utu tai laga dulhan ase. Jinika dulha sadi laga ghor te ghushe, pura gana bajna khan logote, inika hi isor bi ahibo swarg pora awaz kuri kene archangel aru isor laga trumpet loi kene. Aru apuni lok pabo apuni laga atma ke morom kora ke. Oh kiman hi mahima laga din hobo. Hazar manu khan east west north south pora hobo jun khan itu shadi te bhag lobo Abraham, Isaac aru Jacob logote.

Utu din bishi anondo laga din hobo khushi manabo aru angur laga mudu khotom nahobole laga din hobo. Raja mahima laga, tai pora apuni laga sob kami khan pura kuridibo tai laga mahima laga dhon pora. Isor laga bacha khan, apuni tayar ase apuni laga isor ke lok kuribole, tai laga mahima pora ahibole laga homoi te, apuni laga atma hi tai laga dulhan ase. Hoshyar thakibi aru sai thakkibi aru thik pora itu din khan cholabi khemai laga juntu isor pora apuni ke dishe, tuni hoile apuni bi isor ke lok pabi tai aha laga homoi te.

Aji bhabna kuribole laga pobitro koth atu hoile revelations 22:17 aru atma aru dulhan pora koi, ‘ahibi’! aru tai jun hune koi thaks, ‘ahibi’.